IA: Qinigassanngortittut aqqisa allattorsimaffiat piffissaq eqqorlugu tunniunneqarput
Kommunili tusagassiuutinut nalunaarummini allappoq partii kukkusumik siunnersorneqarsimasoq, taamaattumik Qinersinermut Ataatsimiititaliamut akuerineqartussanngorlugu ingerlateqqinneqassasoq.
Inuit Ataqatigiit siulittaasuat, Sara Olsvig, Paamiuniittoq unnummut arfinermut Radioaviiseqarnitsinni toqqaannartumik apersoratsinni aperaarput atsiornermik amigaateqartoqarsimanera qanoq nassuiarsinnaaneraa:
- Siullermik erseqqissaatigissavara qinigassanngortitatta atiisa allattorsimaffiat piffissaq eqqorlugu tunniukkatsigu, atsiorneq amigaataasoq tassaasariaqanngilaq siulittaasup atsiornera, Sara Olsvig oqarpoq, - atsiorsinnaasoq tassaasinnaavoq kattuffiup sinniisua alla, tassanilu kattuffimmi aaqqissuussaanermi siulittaasup tullia Juliane Henningsen atsiornissamut piareersimalluinnarsimavoq, IA-p siulittaasua radioaviisimi tallimanngornermi unnukkut aallakaatinneqarnerani taama oqarpoq.
Aamma atuaruk Kukkusumik siunnersorneqarneq pisuulluni IAp qinigassanngortitani kingusinaarluni tunniuppai
Inuit Ataqatigiit Kattuffiat Kommuneqarfik Sermersuumit siunnersorneqarpoq qinigassanngortittut aqqisa akuerineqarnissaanut partiip siulittaasua atsiortariaqartoq. Siunnersorneqarneq naapertorlugu kattuffiup siulittaasuata atsiornera Paamiunit qarasaasiakkut Kommuneqarfik Sermersuumut piaartumik nassiunneqartoq, Sara Olsvig oqarpoq.
- Kommuneqarfik Sermersuumit taama siunnersorneqarneq ajoraluartumik eqqunngitsuuvoq, nuannaarutigaarpullu piffissaq eqqorlugu tunniussigatta, kommunemiillu kukkusoqarsimaneranik nassuertoqarluni nalunaartoqarmat, Sara Olsvig oqarpoq, - aamma Qinersinermut Ataatsimiititaliaq aalajangersimammat piffissaq eqqorlugu aamma inatsisit malillugit tunniussineq
akuersaarniarneqarmat, IA-mi siulittaasoq Sara Olsvig oqarpoq.