Qimussersuartoqarnissaanut USA-mut qaaqqusissut toqqaannanngitsumik kimigiisertoqarnerata kingorna unitsinneqartoq

Nunatsinni qimussersuartoqarnissaanut atatillugu USA-p nunatsinnut immikkut ittumik aallartitaanut, Jeff Landrymut qaaqqusissut pillugu ilaatigut inoqatinut attaveqaatitigut toqqaannanngitsumik kimigiisertoqarneratigut tunuartinneqarpoq.

Takornariartitsivimmik Experience Qasigiannguanik ingerlatsisoq, Kristian Jeremiassen DR-imut nassuiaavoq.

Taassuma Landry nunatsinni qimussernermik sukkaniuttoqarnissaanut Avannaata Qimussersuanut qaaqquaa. Qimussersuaq Qasigiannguani marsip 28-anni aaqqissuunneqartussaavoq.

Qaaqqusinerli Kalaallit Nunaanni Qimussertartut Kattuffiannit (KNQK) qimussersuaqarnissaanik aaqqissuussisumit iluarineqanngilaq.

KNQK-p qaaqqusisoqarnera isornartorsiorpaa, Landryllu peqataaratarnissaa naleqqutinngitsutut nassuiaatigalugu.

Kristian Jeremiassenip takoriartitsivianit, Experience Qasigiannguanit qaaqqusissut tunuartinneqartoq, KNQK-p sapaammi unnukkut paasissutissiissutigaa.

Kristian Jeremiassenip nammineq aamma Jess Landry Landryllu atorfilittaasa akornanni mailikkut attaveqaqatigiinneq DR-imut nassiuppaa.

- Ajuusaarutigalugu ilisimatitsissutigissavara pilersaarutit suliarisagut tamarmik aaqqissuisunit akerliliisoqangaatsiarnera pissutigalugu naammassineqarsinnaanngimmata. Pilersaarusiatta piviusunngortissinnaannginnera ajuusaarutigilluinnarpagut, DR naapertorlugu Kristian Jeremiassen mailimi taama allappoq.

Taassuma KNQK-mit arlanilluunniit pilersaarutinik qaaqqusissummillu unitsitsinissamut toqqaannartumik nalunaaruteqarfigineqarsimannginnini, tamannali inoqatinut attaveqaatitigut suliamullu tunngatillugu ilanngutassiani atuarsimallugu tusagassiorfimmut erseqqissaatigaa.

- Pakatsingaatsiarlungalu nuannaanngilanga. Kalaallit Nunaat takullugulu nunatsinniinneq qanoq innersoq misigisariaqaraa isumaqarpugut, taanna nangilluni oqarpoq.

Landry Kalaallit Nunaannut marsimi tikeraarnissani pilersaarutigigaluarlugu Fox Newsimut tallimanngornermi apersorneqarnermini oqaatigaa.

Qaaqqusissummik tunuartitsineq Landryp marsimi nunatsinnukarniarneranut kinguneqassanersoq suli ilisimaneqanngilaq.