Qimaasunik nunatsinnukartitsisalernissaq Dansk Folkepartip siunnersutigeqqikkaa

Aaja Chemnitzip oqaasiinik ilanngussiffigalugu nutarterpoq.

Qimaasunut inissiisarfimmi Kujataani pilersitsisoqarsinnaanersoq, Dansk Folkepartip misissorniarpaa.

Nutaarsiassaqartitsivik TV2 taama allappoq.

Dansk Folkepartip tamanna pillugu siunnersuutini aasaanerani naapeqatigiinnerminni saqqummiuppaa, qimaasunut nunatsinni inissiigallarfiusussamik pilersitsinissaq siunnersuutigalugu.

Siunissaq ungasinnerusoq eqqarsaatigalugu nuna alla aamma isumaqatigiissusiorfigineqassaaq.

- Kalaallit Nunaat siunissaq qaninnerusoq eqqarsaatigalugu isumalluutaasinnaavoq. Matumani pingaarnerusoq tassaavoq tamassuma Danmarkimit isumalluutaasariaqannginnera, Dansk Folkepartiip siulittaasua Morten Messerschmidt oqarpoq.

Partii taama ittumik siusinnerusukkut aamma siunnersuuteqareernikuuvoq.

Qimaasunik nunatsinnukartitsisalernissaq Dansk Folkeparti 2015-imi siunnersuutigeqqaarpaa. Nunasinissamut qinnuteqartuni itigartinneqarsimasut pillagaasimasullu Kangilinnguanukartitsisalernissaq 2020-mi aamma siunnersuutigaa.

Dansk Folkepartip nunanut allanut tunngasunut oqaaseqartartorisimasaa, Pia Kjærsgaard, BT-mut taamanikkut ima oqarpoq:

- Kalaallit Nunaat nunarujussuuvoq, taamaammat ingerlaarlulutik ajortuliornissaat toqqissisimanngisitsinissaallu periarfissaanavianngilaq. Tamanna ilaasa angerlarusulernerannik kajumissaataasinnaavoq.

Tamatuma saniatigut Danmark qimaasunik aamma isertitsisarunnaassasoq Danmarkimilu killeqarfinni nakkutilliinerusoqalissasoq, Dansk Folkepartip aamma siunnersuutigaa.

Naamerluinnaq

Kisianni qimaasunik nunatsinnukartitsisoqartalernissaa soqutiginartinngikkipput, Folketingimi ilaasortaq Inuit Ataqatigiinneersoq Aaja Chemnitz tusagassiutinut nalunaarpoq. 

- Kalaallit Nunaat pillugu sumiluunniit aalajangiisoqassanngilaq, Kalaallit Nunaat peqataatinnagu. Qujanartumillumi isumaqarpunga tamanna Folketingimi amerlanernit nalinginnaasumik paasilluarneqartoq. Taamaammat isumaqarpunga Dansk Folkepartiimit siunnersuut ataqqinninnginnerusoq pissutsinillu paasisimasaqannginnermik ersersitsisuusoq. 

- Tamatuma saniatigut eqqissillunga oqarsinnaasorivunga Kalaallit Nunaanniit siunnersuut itigartinneqassasoq, taanna oqarpoq. 

Inuit Ataqatigiit taamaaliortoqartalernissaanut itigartitsisareerpoq. Danmark tamanna akisussaaffigimmagu nunatsinnut miIoriutiinnarneqarsinnaanngitsoq, Inuit Ataqatigiit isumaqarput.