Danskit politikeriisa inuit Danmarkimi nunamut qimaasutut qinnuteqartut itigartinneqartut suneqartassanersut ukiorpassuarni oqallisigaat.

Taakku piffissami matumani Jyllandimi nunamit aallartitassanut inissiisarfimmukartinneqartarput, Dansk Folkepartiili aalajangiisussaaguni nunamut qimaasutut qinnuteqartut itigartinneqarsimasut pinerluuteqarsimasullu nunatsinnut – Kangilinnguinut Sakkutooqarfittut aamma ilisimaneqartumut nassiunneqartalissapput.

Aviisi BT taama allaaserisaqarpoq.

- Kalaallit Nunaat nunarujussuuvoq, taamaammat ingerlaarlulutik ajortuliornissaat toqqissisimanngisitsinissaallu periarfissaanavianngilaq. Tamanna ilaasa angerlarusulerneranik kajumissaataasinnaavoq, nunanut allanut tunngasunut oqaaseqartartoq, Pia Kjærsgaard BT-mut oqarpoq.

AAMMA ATUARUK Sakkutooqarfiusimasumi illut isaterneqalerput

BT-p allaaserisaa naapertorlugu siunnersuut Venstremit taperserneqanngilaq. Taakku nunanut allanut tunngasunut oqaaseqartartuata, Mads Fugledep oqarnera naapertorlugu tamanna akisuallaassaaq, naalakkersuisulli partiivisa, Socialdemokratiit nalunaaruteqarneq ammaffigineruaat.

- Isumassarsiaq pilerinarpaluppoq. Nunatsinnut tikittartut nunamut qimaasutut isernissamik qinnuteqarnermi suliaqarfigineqartut itigartinneqartullu aallaqqikkusuttannginnerat ajornartorsiutigalutigu takusinnaavara, nunanut allanut tunngasunut oqaaseqartartoq, Rasmus Stoklund oqarpoq.

KNR-ip Naalakkersuisut oqaaseqartinniarsarigaluarpai, tamannali maannamut suli iluatsinngilaq.

Kangilinnguit nunatta kujataani Arsuup eqqaaniippoq. Kangilinnguit USA-mit Sorsunnersuup Aappaani 1941-mi pilersinneqarpoq, tamannalu illersornissamut isumaqatigiissummut, amerikamiut danskit diplomatiannut, Henrik Kaufmannimut isumaqatigiissutaannut ilaalluni.

Sakkutooqarfiusimasoq piffissami nutaanerusumi Issittumi Sakkutooqarfiup sumiiffigigaluarpaa, Issittumi Sakkutooqarfilli Nuummut nuummat 2012-mi matuvoq.

Sakkutooqarfiulli ammaqqinneqarnissaa kinamiut suliffeqarfiata, General Nice Groupip sumiiffimmik tigusinissamut soqutiginninnermik oqarfiartuuteqarnerata kingorna 2016-imi aalajangerneqarpoq.