Kangilinnguit Sakkutooqarfiusimasumi illut isaterneqalerput
Illut nunap ilaani "halv tolv"-imiittut Kommuneqarfik Sermersuumit Illersornissaqarfimmiillu atorneqarunnaarsimasut isaterneqarnissaat kommunip Illersornissaqarfiullu illuutinik aqutsisoqarfiata ataasinngormat isumaqatigiissutigaat.
Isumaqatigiissut Naalakkersuisut siulittaasuata Kim Kielsenip danskillu illersornissamut ministeriata Claus Hjort Frederiksenip Kangilinnguani saliisoqarnissaanik siorna isumaqatigiissuteqarnerannit aallaaveqartoq, Illersornissaqarfik allappoq.
Tassalu eqqakkat illullu atorneqaqqinnavianngitsut piaarnerpaamik peerneqartussanngorput.
Illersornissaqarfiup illut sorliit suli atorfissaqartinnerlugit ukiumi matumani kingusinnerusukkut paasissavaa, tamatumalu kingorna Kangilinnguani illut sinnerisa isaterneqarnissaannut pilersaarusiortoqassaaq.
Illersornissaqarfik naapertorlugu, saliineq Kommuneqarfik Sermersuumit aaqqissuunneqassaaq naammassineqassallunilu.