Nuka Alice: Qilaatersorneq nukimmik nassuiaruminaatsumik pilersitsisarpoq
Ilaqutariit inuillu nuannisarusuttut Qooqqut festivaalimi akunnerup naanerani ataatsimoortussanngorput.
Qooqquni nipilersortut, filmerneq, oqalugiartullu ilaatigut misigisassaapput.
Eqqumiitsuliortut arlallit peqataassapput, ilaatigut qilaartersortoqassalluni.
Nuka Alice Lund qilaatersortussanut ilaavoq. Qooqqut festivaalimi aatsaat qilaatersulinngilaq.
Qooqquniittarninilu nuannarilluinnartarpaa:
- Festivaalit ima ittut ilaqutariinnut tulluarsakkat pingaaruteqarsorilluinnarpakka imigassartorfiunatik ilaqutariinnerup, ilaqutariittut peqatigiinnerup qitiutinneqarnera taanna assut nuannarigakku qaaqqusaagaangama peqataajuaannarpunga.Taanna oqarpoq.
Ataatsimoorneq misigalugu
Qilaatersorneq Nuka Alice Lundimut ataatsimoornermik misigititsisussaaneranut sammivoq. Ataatsimoornermik misigisaqarfiussasoq. Suugaluarpalluunniit.
- Taava inngertut amerligaangata inngerut suli anginerulersutut ittarami. Taanna assut pikkugisarpara. Nukik oqaatsit inugaannik nassuiaakkuminaattoq kisianni soorlu misigisassaq, oqarpoq nangillunilu:
-Taava ilaasa utertifigisarpaannga soorlu misigisimallutik soorlugooq sunapinerpoq maqaasinikuullugu nalullugu suunersoq misigalugu, itisuumik misigalugu
Tusarnaarttut nukinik tunisisarput
Nuka Alice Lund-i 2009-mi qilaatersortalerpoq. Tassanngaanniillu qilaatersorneq aallutilerpaa.
Qilaatersornerlu ingerlateqqikkusuttarlugu oqaluttuarpoq:
- Taamanililu aamma paasillugu qanoq nuannertiginersoq taavalu qanoq pissassannartiginersoq atugaralugu soorlu inuttut tappinnerulertutut misigisimavunga taannalu misigissuseq piumasunut piumassuseqartunut ilikkarusuttunut ingerlateqqikkusuttuaannarakku taamanili tassa sammisaqartitsisalerpunga taanna oqarpoq.
Nuka Alice Lundip festivaali ammassavaa inngerut ammaanersiut inngerutigalugu. Tusarnaariat festivaalimut peqataajartortut, inuit akuusut inngerutimik atuiffigalugit festivaalip aallartilluarnissaa pingaartillugu oqaatigaa:
- Taalliortartuulluni erinniortartuulluni nukippassuit atornartaramik pissanganartarlunilu taamatut avammut saqqummiinissaq, oqarpoq nangillunilu:
- Taava taakkua nukinnik eqqarsaatikkut tunerusullugit taavalu inuit tusarnaartussat taakkua tigusilluarsinnaaniassammata taavalu tapersersuilluarlutik ersaattaalluarlutik taanna siunertaralugu tassa inngerut taanna ammaassissut sanagakku.Nuka Alice Lund oqarpoq.
