Qeqqata Kommuniani unnuisarfiit, ikiorsiissutit innarluutillillu sipaarniuteqarfigineqangaatsiartut
Qeqqata Kommunia ukiup matuma sinnerani aappaagulu sipaarniuteqarpoq.
Qeqqata Kommuniani kommunalbestyrelsip juulip sisamaanni immikkut ittumik ataatsimeereersorlu taamaaliorpoq. Kommunalbestyrelsimi ilaasortani amerlanerussuteqartut Siumumeersut, Inuit Ataqatigiinneersut Atassummeersullu kommunip missingersuusiaasa tamarmiusut procentit marluk missaannik sipaarniuteqarfigineqarnissaannut akuersipput.
Soorlu sunngiffimmi ornittakkat, atuarfiit, isumaginninnermi sulisut sulinermilu angalanissat sipaarniuteqarfigineqarput.
Kommunalbestyrelsimi ilaasortani sisamat Naleqqameersut sipaarniuteqarnissamik siunnersuut akerleraat.
Sipaarniuteqarnerup qanoq kinguneqarnissaa allaffeqarfimmiit innersuussutini nassuiarneqanngitsoq, Naleraq isumaqarpoq.
Unnuisarfiit ammasarfii sivikillineqassasut arsaattarfiillu aserfallatsaalineqassanngitsut
Soorlu teknikkeqarnermik suliaqarfiit, inuit ikiortariallit sunngiffimmilu sammisassaqartitsinerit sipaarniuteqarfigineqarput.
Isumaginninnermik suliaqarfiit 2022-mi 5,6 millionit koruuninik 2023-milu 8 millionit koruunit missaannik sipaarniuteqarfigineqarput.
Tamanna ilaatigut Sisimiuni Maniitsumilu unnuisarfiit ammarsarfiisa sivikillineqarnerannik Maniitsumilu ikiorsiissutissanut aningaasaliissutikinnerunermik tamaanilu innarluutilinnut pisartagaqartitsikinnerunermik kinguneqassaaq.
- Sisimiuni Maniitsumilu unnuisarfiit - 1 million koruunit
- Maniitsumi ikiorsiissutit – 2 millionit koruunit
- Maniitsumi innarluutilinnut pisartagaqartitsineq - 1,5 millionit koruunit
- Asfaltilersuineq - 200.000 koruunit
- Arsaattarfinnik aserfallatsaaliinissaagaluit tamarmik taamaatipput
- Qatserisartoqarneq - 225.000 koruunit
- Ilinniartitaaneq - 7,2 millionit koruunit
- Aningaasaqarnermik ingerlatsineq - 2,5 millionit koruunit
AAMMA ATUARUK Hans Enoksen Qeqqata Kommuniani politikkimut uteqqittoq
1,5 millionit koruunit teknikkeqarnermik suliassaqarfinnut ukioq naatinnagu pissarsiarineqartussaapput, ilaatigut 200.000 koruuninik asfaltilersuinermi sipaarniuteqarnikkut arsaattarfinnillu aserfallatsaalinissaagaluanik tamanik taamaatitsinikkut. Aamma qatserisartoqarneq 225.000 koruuninik ukiup matuma sinnerani sipaarniuteqarfigineqarpoq.
7,2 millionit koruunillu ilinniartitaanermut ukioq manna aamma pissarsiarineqartussaapput.
Ilinniartitaanermi suliaqarfiit assigiinngitsut qanoq sipaarniuteqarfigineqartigissanersut, kommunalbestyrelsip ataatsimiinneranit imaqarnialiami nassuiarneqanngilaq.
Kangerlussuarmili atuareernermi ornittagaq sunngiffimmilu sammisassaqartitsivik Qooqa katinneqassasut kommunimilu katersugaasiviit, atuagaateqarfiit, timersortarfiit naluttarfiillu ammarsarfii sivikillineqassasut, kommunalbestyrelsi aalajangerpoq.
Aningaasaqarnermillu ingerlatsineq 2,5 millionit koruuninik ukioq manna aamma sipaarniuteqarfiginiarneqarpoq.
Suli naluttarfiliulersaartoq
Kommuni suliaqarfippaalunni sipaarniuteqaraluarluni Sisimiuni ataatsimik Maniitsumilu ataatsimik katillutik 216 millionit koruunit missaannik akilinnik suli naluttarfiliulersaarpoq.
Naluttarfiliornissanut siunnersortissarsiorluni taakkununnga suliariumannittussarsiortoqareerpoq.
Kommunili naluttarfiliornissanut aningaasaaliissutissanik aningaasaateqarfinnut qinnuteqalersaarpoq. Kommunili naluttarfiliornissanut aningaasartuutissat minnerpaamik 10 procentii tassalu 21.630.000 koruunit nammineq aatsaat akilersinnaappagit, aningaasaateqarfiit aningaasalersueqataarusussasut naatsorsuutigineqarpoq.
Kommunilli naluttarfiit ingerlanneqarnerannut aningaasartuutit akilertassavai, taakkualu ukiumut 5 millionit koruunit 9 millionit koruunillu akornanniissangatinneqarput.
Naluttarfiit taakku utoqqaat inuusuttullu peqqissussaannut iluaqutaasinnaassasut, kommunalbestyrelsimut innersuussummi allaqqavoq.
Kommunilu naluttarfiliornissanut aningaasaliissutissaqarluarpasittoq kommunalbestyrelsillu Maniitsumi Sisimiuniluunniit naluttarfiliortoqaqqaassaneranik aalajangiisuussasoq, kommunalbestyrelsip ilinniartitaanermut ataatsimiititaliaata innersuussutaani aamma allaqqavoq.
