Hans Enoksen Qeqqata Kommuniani politikkimut uteqqittoq

Hans Enoksen Naleqqami partiip siulittaasuatut sapaatit akunneri marluk matuma siorna tunuarpoq.

Taanna Qeqqata Kommuniani kommunalbestyrelsimut maanna uteqqippoq.

Kommunalbestyrelsip juunip ulluisa 23-anni nalinginnaasumik ataatsimiinnerannit imaqarniliaq naapertorlugu Hans Enoksenip qinnuteqaataa politikerit suliaraat. Qinnuteqaat Hans Enoksenip kommunalbestyrelsimiileqqikkusulluni maajip ulluisa 31-anni nassiussarisimasaanut tunngavoq.

Politikeri masilittagaqarluartoq kommunimut siorna qinersisoqarnerani kommunalbestyrelsimut qinigaavoq. Taassumali Inatsisartuni suliaqarnini, ilaatigut siulittaasuunini pissutigalugu Hans Enoksen kommunalbestyrelsimit piffissami killiligaanngitsumi sulinngiffeqarallarnissamik qinnuteqarpoq.

Kommunalbestyrelsimi ilaasortat sulinngiffeqarallartut qaqugukkullunniit qinnuteqaqqissinnaanerat pissutigalugu taassuma qinnuteqaataa Qeqqata Kommuniani kommunalbestyrelsimit akuerineqartoq imaqarniliami allassimavoq.

Hans Enoksenip sulinngiffeqarnerata nalaani Naleqqamit Steffen Johansen kommunalbestyrelsimi sinniisuuvoq, Hans Enoksenili maanna atuuffiniileqqimmat taanna tunuarpoq.

KNR-ip Hans Enoksen oqaaseqartinniaraa, tamannali suli iluatsinngilaq. KNR-ip Hans Enoksen sooq kommunalbestyrelsimut uteqqinniarluni aalajangernersoq Inatsisartunilu ilaasortaaginnarniarnersoq apererusuppaa.

Hans Enoksen Naleqqami partiit siulittaasuatut atuuffimminit erngertumik tunuarpoq. Taanna partiimik 2014-imi pilersitseqataavoq, tamatumalu kingorna siulittaasuusimalluni.

Taassuma partiip siulittaasuatut erngertumik tunuarnera imminut pissuteqarpoq.

Hans Enoksen politikkikkut suliaqangaatsiarnikuuvoq. Taanna ilaatigut Naalakkersuisunut 2002-mit 2009-mut partiimit Siumumit siulittaasuuvoq.

Hans Enoksenittaa nunatsinni Inatsisartuni qinigaaffinni marlunni siulittaasuuvoq.