Qeqqata Kommunia UNESCO-p allattorsimaffianut aamma ilarusuppoq

Kommuuni Kujalleq UNESCO-p Nunarsuarmut kingornussarititaasa allattorsimaffianut qinnuteqarnissaminut piareersarpoq.

Aamma Sisimiut Kangerlussuullu akornanni piniartarfiup UNESCO-p allattorsimaffianut ilanngunneqarnissaa Qeqqata Kommunianit  ukkanneqarpoq.

Tassunga atatillugu Qeqqata Kommunia, Sisimiuni Kulturikkut Illorsuarmi Taseralimmi innuttaasut peqataatinniarlugit arfininngornermi januarip 31-ani saqqummersitsivoq, soqutigisaqaqatigiillu ullaap tungaani peqataatinneqarlutik. Peqataatitsinermi qinnuteqarnissamut tunngavissatut isumassarsiat katersorneqassapput.

- UNESCO-p nunarsuarmioqatigiinnut kingornussassatut eriagisassanngortitsinissamut eqqarsaatersuutigut ajunnginnersut pillugit illoqarfitsinni peqatigiiffippaaluit innuttaasullu isumaat tusarnissaannut kiisalu Sisimiut Kangerlussuullu akornanni nunatap atuilluarluni ineriartortinneqarnissaa qanoq ililluta qulakkeersinnaaneripput pillugu takusaqarnissara borgmesteritut qilanaaraara, borgmesteri Hermann Berthelsen oqarpoq.

UNESCO-llu allattorsimaffianut ilanngunneqarnissaq pillugu Naalakkersuisoqarfiit assigiinngitsut, Danmarkimilu Kulturstyrelsi Qeqqata Kommunianit aamma ataatsimeeqatigineqarput.

Aaqqissuussat februarip aallaqqaataani innuttaasunut ataatsimiisitsinermik nalunaaqutaq arfineq marlunut Taseralimmi naggaserneqassapput. Tassanilu pinngortitamut, avatangiisinut inatsisinullu atuutsitsinermut naalakkersuisoq Mala Høy Kúko peqataassaaq.