Qeqertarsuarmiu Isak Hansen sølviusumik nersornaaserneqartoq

Isak Hansen 17-inik ukioqarluni raajarniutini inuttatut sulisalerpoq. Ukiorpassuillu qaangiummata taassuma pisortani ukiuni 40-ni sulisimanini pillugu Dronningip nersornaasiuttagaanik nersornaaserneqareernikuuvoq.

Allattoq Nutaarsiassaqartitsivik / Nyhedsredaktionen

juulip 11-at 2023 12:42

Qeqertarsuarmiu Isak Hansen sølviusumik nersornaaserneqarpoq.

Taanna nersornaaserneqarpoq ”ukiorpassuarni sulinermigut najukkami naalakkersuinikkut ingerlatsinermi annertuumik tunniusimanini kiisalu sulisartut inuuniarnikkut atugaasa pitsanngorsarneqarnissaannut oqaaseqartartutut inissisimanini pissutigalugu”, Inatsisartut taama tunngavilersuuteqarput.

NERSORNAAT

Nersornaasiunneqartartoq saqqarmiuuvoq nersornaat.

Taanna Inatsisartut siulittaasuannit tunniunneqartarpoq.

Nersornaat innuttaasunut tamanut nunatsinni piffissami sivisuumi pingaarutilinnik suliniuteqarsimasunut nersortarialinnut tunniunneqartarpoq, tamatumanittaaq kalaallit oqaasii, kulturiat, isigineqarnerallu pillugu annertuumik nersortarialimmik suliniuteqarsimasumut tunniunneqarsinnaavoq.

Nersornaat guldtiusoq sølviusorlu nersornaasiissutigineqartarput.

Nersornaat guldtiusoq ukiumut ataasiaannarluni tunniunneqartarpoq.

Nersornaat sølviusoq annerpaamik ukiumut tallimariarluni tunniunneqartarpoq.

Allisiguk

Nersornaasiineq Hotel Disko Islandimi ippassaq pivoq. Inatsisartullu siulittaasuata tulliata siulleq Kristian Jeremiassen (Inuit Ataqatigiit) nersornaasiisuuvoq.

- Tamanna uppernarsarneqarpoq 2020-mi ukiuni 40-ni pisortani sulisimanerit pillugu dronningip saqqarmiuliuttagaanik tunineqaravit aamma 2021-mi SIK-p immikkoortortaqarfiani ukiuni 40-ni ilaasortaasimanerit pissutigalugu Ôdâq Olsenip aningaasaaqateqarfianit SIK-mit kajumissaaserneqarputit. Ukiorpassuarni sulisimaninnut aamma soraarninngoreeraluarlutit sivisungaatsiartumik sulisimaninnut tamanna uppernarsaataavoq, Kristian Jeremiassen Isak Hansenimut oqarpoq.

Aamma atuarukNakorsaaneq sølviusumik nersornaaserneqartoq: Tulluusimaaqaanga

- 17-iinnarnik ukioqarlutit raajarniutini inuttatut Qeqertarsuarmullu tunioraallutit sulinerit aallartippat. Ukiuni arlalinni taama inuussutissarsiuteqareerlutit 1970-ikkuni umiarsuaaqqat naalagassaattut ilinniarninni førstegrad angusimavat. Taama ilinniagaqarnerit imaani allanik pissanganartunik suliaqalersippaatit, arlaleriarlutit angallatit Danmarmikimiit nunatsinnukaanneqarnerini peqataasarsimagavit. Tamanna namminermi sapiitsuliorneruvoq, Kristian Jeremiassen oqarpoq.

Isak Hansen Qeqertarsuup Kommunerisimasaani kommunalbestyrelsemut Inuit Ataqatigiit sinnerlugit ilaasortaasimavoq. Taanna 1980-imiit soraarninngornissami tungaanut Nukissiorfimmi sulivoq.

- Illoqarfigisanni sivisuumik sullissisimaninnut, suliffigisarsimasannut illoqarfimmilu ataatsimoornissamut – politikkikkut suliaqarnikkut pitsaasumik sunniuteqaqataasimaninnut nersorniarneqarnerit uppernarsaataapput, Kristian Jeremiassen oqarpoq.

Nutaarsiassami kukkunermik nassaarsimaguit uunga allaffigineqarsinnaavugut.