Nakorsaaneq sølviusumik nersornaaserneqartoq: Tulluusimaaqaanga
Angalanissamut killilersuutit eqqaamavigit?
Misissuisarfiit matunnginnerini misissortinniarlutik tunuleriiaartorpassuit, misissuutillu takituut qinngakoortereeraanni plastikkimi qaqortumi titarnernik marlunnik utaqqisarnerput eqqaamaviuk?
Aamma qanermut assiaqutit, isarussat aallertut angerlarsimalluni sulinerit?
Immaqa puigoreerpatit. Imaluunnit naamik. Tamakku tusaqqippatit pissutigalugu nakorsaaneq Henrik L. Hansen coronap nalaani ukiuni marlunni sulisimanini pillugu nersornaammik sølviusumik nersornaaserneqarmat.
AAMMA ATUARUK Grønland ændrer regler: Du behøver ikke længere gå i isolation, når du har corona
Taanna Inatsisartut siulittaasuannit Kim Kielsenimit (S) ippassaq nersornaaserneqarpoq.
”Henrik L. Hansen tunillaassortunik nappaalanersuaqarneranut kommissioni Covid-19-ip tuniluunnera eqqarsaatigalugu peqqissutsimut tunngatillugu periusissamik qanorlu passunneqarnissaanut pilersaarummik, kingusinnerusukkullu tuniluunnermik nunatta pitsaasumik aniguineranut aqqutaasumik, qularnaarunniarlugu annertuumik suliaqarsimanera pissutigalugu”, taama tunngavilersuuteqarpoq.
- Tulluusimaaqaanga, Henrik L. Hansen KNR-imut oqarpoq.
Ukiunili marlunni kisimi sulerusussimanani erseqqissaavoq.
- Inuiaqatigiit tatiginninnatillu tapersersuisimanngitsuuppata allatorujussuaq isikkoqarsimassagaluarpoq, taanna oqarpoq.
- Ulapputtoqarnikooqaaq. Namminersorlutik oqartussani, kommuneni minnerunngitsumillu peqqinnissaqarfimmi sulisut ulapissimaqaat.
Aalajangiussat nutaat
Nersornaat Hans Egedep Illuani ippassaq tunniunneqarpoq.
Ukiut marluk coronaqarnerata nalaani pisut eqikkarlugit Kim Kielsen nakorsaanermut ima oqaaseqarpoq:
Asseq: Inatsisartut
- Ukioq 2020 naluneqanngitsutut nunarsuaq tamakkerlugu tunillaassuunneq nalitsinni siusinnerusukkut naammattoorneqarsimanngitsoq taamatullu aamma qanoq ingerlanissaa naanissaali eqqoriarneqarsinnaasimanngitsoq aallartippoq. Piffissaq tamanna imaannaasimanngilaq, aalajangiisartunut, innuttaasunut, suliffeqarfinnut minnerunngitsumillu peqqinnissaqarfimmi sulisunut, tunillaassuunneq eqqarsaatigalugu suliassanut sallerpaajusussaasimasunut. Maannalu tunillaassuunneq kingumut qiviarsinnaalereeratsigu oqartariaqarpugut ilaatigut sulilluarnikkut piffissamik ilungersunartorsiorfiusimasumik nunatta qaangiinera assut iluarisimaarsinnaagatsigu, Kim Kielsen nakorsaanermut oqarpoq.
- Virusi nunatsinnut anngutillarmat pisortallu ingerlatsinerat tamarluinnarmi allanngortittariaqalermat, aalajangiinissanut imaannaanngitsunut pisariaqartunulli atatillugu naalakkersuisunut pitsaanerpaamik siunnersuisinnaanissaq anguniarlugu ullut unnuarlu qasusuillutit sulisimavutit.
Inuppassuit ulappussimasut
Henrik L. Hansenilumi eqqaamasaqarpoq.
- Coronaqaleqqaarmat virusi Kalaallit Nunaannut anngutitinnaveersaarparput. Tamanna inupparujussuarnut ajornartorsiortitsigaluartoq . Kinguneranilu akiuussusersuinerit annertuut naammassiniarnerini nukippassuit atorneqarput. Taamaammat inuppassuit uanga peqatigalunga assigiinngitsorpassuarnik suliaqarput, taanna KNR-imut oqarpoq.
Coronamut tunngatillugu Nunatta Nakorsaaneqarfia naalakkersuisunut siunnersuisarput angalanissamullu killilersuusiornernut peqataalluinnarlutik.
Akiuussutissat nunatsinnut anngummata nuna tamakkerlugu akiuussusersuinissat Nunatta Nakorsaaneqarfianit piareersarneqarput.