Qeqertani periarfissarpassuusut
Marlunngornermi oqaluttuaraarput Qeqertat nunaqarfinngorteqqinniarneqartut, suleqatigiiaallu assigiinngitsut aallartisalereerput.
AAMMA ATUARUK Qeqertat skal være bygd igen
DTU-mi professori Kåre Hendriksen arlaleriarluni Qeqertaniittarsimasoq, qullukkiornerlu pillugu nalunaarusiorsimasoq isumaqarpoq Qeqertat nunaqarfittut ineriartortitsiffiusinnaasoq.
- Qeqertat periarfissaat tassaapput qaleralinniarneq, qilalugarniarneq avannaanilu tuttoqarfeqarmat aavartoqarsinnaalluni.
Tunitsivik aallartissasoq
Nunaqarfimmiut naapittarsimavai ataatsimik qaammataasakkoortumik oqarasuaatillit, generatorimillu kiassarneqartut kallerup inneqaratilli.
- Qeqertani innuttaasut aalisakkanut tunitsivittaarusupput, kallerup inniliorfittaarlutik, imeqarfittaarlutik iluamillu pisiniarfittaarlutillu pitsaasunik najugaqarfissaminnik illutaartorlutik, Kåre Hendriksen oqarpoq.
Qaanaamiut Qeqertanukarutussut
K'ulutana Kvist Qaanaarmiunut Qeqertanut qaleralinniariartortartunut ilaavoq.
- Qeqertani ukiuunerani qaleraleqarpoq, qaleralippassuupput taqqama. Illukaqattaalaaginnarluni amusassarpassuaqarpoq aamma aasakkut qilalugaamasarput.
Taassumattaaq nalornisiginngilaa Qeqertat nunaqarfinngoqqippata amerlasuut periarfissaq atorluarumaaraat.
- Ilaana, nuukkusuttoqarpoq. Inuit tusartarpakka taamatut oqaluttut; "Qeqertani illussaqaraluaruma nuussagaluarpunga". Kallerup innera immaqa kinguarsaataalaaginnarunarami, inerisarneqalerpat Qeqertamut nuuttoqarnissaa ilimanarluinnarpoq, K'ulutana Kvist taama oqarpoq.
