Qaqqasiortartoq rekordiliisoq: Mount Everest 23-ssaanik qaqigaa
Nepalimi sherpap, Kami Ritap qaqqaq 8848 meterinik portussuseqartoq pingasunngornermi ullaakkut qaqivaa - tamannali siullermeernerunngilaq, 23-ssaalli qaqillugu.
Nepalimi naalakkersuisut oqaaseqartartuat nutaarsiassaqartitsivimmit AP-mut taama oqarpoq.
Kami Rita qaqqasiornermi angalatitsisuuvoq, taakku nepalimiusut sherpanik taaneqartarput, nunallu tamalaat akornannit qaqqasiortartut Himalayami aqqutissiuuttarlugit.
Kami Ritap qaqqat portunersaannut 23-ssaanik qaqinermini nammineq rekordini qaangerpaa. Kami Ritammi qaqqat 22-riarluni nunarsuarmi kisiartaalluni qaqinikuullugu rekorderigaluarpaa.
AAMMA ATUARUK Mount Everestimut 2018-imi qaqisut aatsaat taama amerlatigisut
Guinness Rekordbogilu naapertorlugu rekordiliineq taanna tigummiinnarsinnaavaa. Rekordiliinissamut qaninnerpaat marluk qaqqaq 21-riarlutik qaqinikuuaat taakkulu qaqqasiortarunnaarnikuupput.
Mount Everestip Edmund Hillarymit sherpamiillu Tenzing Norgayimit 1953-imi siullerpaamik qaqineqaqqaarneranit qaqqasiortartut 290-it missaanniittut qaqqami ajunaarnikuupput.
Inuillu 4000-it sinneqartut Mount Everest 1953-ip kingornatigut qaqinikuuaat.
/ritzau/
