Qaqqanit "navianaateqartumik qanittumi sisoortoqarnissaa" takussutissaqanngitsoq
Qaqqanit ”navianaateqartumik qanittumi” sisoortoqarnissaanut imaluunniit tamatuma kingorna Uummannap Sulluani sumiiffinni inoqarfiusuni navianartumik mallerujussuarnissaanut takussutissaqanngilaq.
Aatsitassanut Naalakkersuisoqarfik tusagassiuutinut nalunaarummi allappoq.
”Qaqqalli qajannartortaannit ujaqqat nakkaanissaat annikinnersunillu sisoortoqarsinnaanera ilimanaateqartorujussuusoq”, qaqqanik nakkutiginninnermi paasissutissat takutippaat.
Qaqqat aalasoqarfiusut Karrat Kangerluata ungasinngisaaniipput. Qaqqami tassani 2017-imi tassaarsuaarpoq. Qaqqamit sisoortoqarnera nunap sajunneranit, richterip uuttuutaanit 4.0-imik sakkortussuseqartutut uuttorneqartumit aallartippoq. Tamanna nunaqarfinnut Nuugaatsiamut Illorsuarmullu annguttumik tassaarsuaarneranik kinguneqarpoq.
Inuit nunaqarfinnit marlunnit qimagussorneqarput. Inuit 170-it qimagussortinneqarput, inuillu sisamat ajunaarlutik. Nunaqarfiit maanna najugaqarfigineqanngillat.
Qaqqani nikikkiartortoqartuaannartoq
Qaqqalli nikikkiartortut eqqaanni najugaqartoqanngilaq.
Umiammakku Nunaanni Kangerluarsummilu qaqqani qajannartoqartut ilaanni, pingaartumik Umiammakku Nunaata eqqaani millimeterialunnit centimeterinut nikikkiartortoqartuaannartoq nakkutilliinerup takutippaa.
Nunalli ilua decembarip naanerani qerimmat qaavaniittut nikerarunnaarnerusut, Aatsitassanut Naalakkersuisoqarfik nalunaarpoq.
Naalakkersuisoqarfik Uummannap Sulluani qaqqamit sisoortoqarnissaanut atatillugu naliliinermik tulliani qaammatip ataatsip missaa qaangiuppat nalunaaruteqaqqissaaq.
