Qaqortumi mittarfissamik suliariumannittussarsiorneq aallarteqqittoq
Sanaartugassanik suliassinneqartartut Qaqortumi mittarfiliornissamut suliariumannittuuniarsinnaaqqilerput. Kalaallit Airportsimmi suliariumannittussarsiuussineq aallarteqqippaa.
Sermitsiaq.ag taama allaaserisaqarpoq.
Qaqortumi mittarfimmik sanaartornissamut suliniut 2020-mi aggustimili uninngaannalerpoq. Kalaallit Airportsimmi timmisartup mittarfissaanik mittarfiullu illutassaanik sanaartornissap suliariumannittussarsiuunneqarnera unitsiinnarniarlugu aalajangernikuuaa.
Suliariumannittussarsiuussinermi neqerooruteqartut Kalaallit Airportsip missingersuutaanut sanilliullugit akisunerummata timmisartuuteqatigiiffik taamaatitsiinnarpoq.
AAMMA ATUARUK Qaqortumi mittarfiliornissamut suliariumannittussarsiuussineq taamaatiinnarneqartoq
Timmisartuutileqatigiiffik maanna misileeqqippoq, tamatumuunalu suliariumannittussarsiuussineq aallaanerulaarluni.
Kalaallit Airportsip pisortaata, Jens Lauridsenip oqarnera naapertorlugu sanaartornermik suliassinneqartut timmisartup mittarfianik sanaartornissap saniatigut mittarfiup illutassaata sanaartornissaa aamma suliariniarsinnaavaat.
- Suliassaq taannarpiaq suliariumannittussarsiuuteqqinneqarpoq, allaanerussutigilaarpaali sanaut maanna timmisartoqarfiup illutassaata sananeqarnissaanut aamma neqerooruteqarsinnaanerat, Kalaallit Airportsimi pisortaq Jense Lauridsen Sermitsiaq.AG-mut oqarpoq.
Tusagassiorfik naapertorlugu Kalaallit Airportsip suliffeqarfiit siullermik suliariumannittussarsiuussinermi peqataasut attavigai.
Suliariumannittussarsiuussineq aggustimi taamaatiinnarneqarmat suliffeqarfiit tallimat Qaqortumi sanaartornissamut neqerooruteqarsimagaluartut Kalaallit Airportsip paasissutissiissutigaa.
Suliffeqarfiit taakku tassaapput canadamiut suliffeqarfiat, Pennecon Dexter Joint Venture, savalimmiormiut sanaartornermik suliffeqarfiat J & K Petersen Contractors, danskit islandimiullu suliffeqarfiat, Aarsleff-Ístak Joint Venture aamma danskit suliffeqarfii marluk, MT Højgaard A/S aamma Munck Gruppen A/S.
