Qaqortumi mittarfiliornissamut suliariumannittussarsiuussineq taamaatiinnarneqartoq

Kalaallit Airportsip Qaqortumi mittarfissap sanaartornissaa unitsikkallarpaa. Suliniut naatsorsuutigisamit akisunerungaatsiarpoq
- Suliassami sipaarutissanik pisariaqartunik nassaarnissaq imaluunniit neqeroorummut akigititap appartinnissaa ajornartoq, ingerlatseqatigiiffiup paasivaa, taamatullu maannakkut neqeroorutit atorunnaarfissaat sioqqullugu aningaasalersuutissanik annertunerusunik neriorsuummik pissarsinissaq periarfissaqarsimanani, Kalaallit Airports tusagassiuutinut nalunaarummi allappoq.
Allattoq Malik Brøns
aggustip 20-at 2020 10:58
Nutserisoq Connie Fontain

- Qaqortumi mittarfissamut suliaqarnerit ukioq manna aallartinnissaat Kalaallit Airports Domestic A/S qilanaarisorujussuusimavaa, taamaattumillu neqeroortitsinerup taamaatinnissaa pillugu aalajangiinissaq pisariaqarmat ajuusaarutigisorujussuullugu.

Kalaallit Airportsip siulersuisuini siulittaasoq, Johannus Egholm Hansen tusagassiuutinut nalunaarummi oqarpoq.

Kalaallit Airportsip piginneqatigiiffiutaata Kalaallit Airports Domesticip Qaqortumi mittarfissap illutassaatalu sanaartorneqarnissaanut suliarinnittussarsiuussiunnaarniarluni aalajangerpaa.

Mittarfiliortiterneq

* Nuummi Ilulissanilu mittarfiit 2200 meterinut tallineqassapput, Atlantikoq qulaallugu timmisartuussinermi mittarfittut atorneqarsinnaanngortillugit.

* Qaqortumi nunap immikkoortuani meterinik 1500-nik takissusilimmik mittarfiliortoqassaaq.

* Mittarfissat taakku pingasuusut 3,6 milliardit koruunit missaannik akeqassangatinneqarput..

Kalaallit Airportsip suliarinnittussarsiuussinermi neqeroorutit tigusai Kalaallit Airportsip missinngersuutaanut sanilliullugit annertunerungaatsiarnerat pissutigalugu ingerlatseqatigiiffik taamaatitsiinnarpoq.

AAMMA ATUARUK Ingerlatseqatigiiffiit tallimat Qaqortumi Mittarfiliortuuniartut

Ingerlatseqatigiiffiit tallimat Qaqortumi mittarfiliornissamut suliumanninniarsimapput.

Ingerlatseqatigiiffiit tassaapput canadamiut ingerlatseqatigiiffiat, Pennecon Dexter Joint Venture, savalimmiormiut ingerlatseqatigiiffiat J & K Petersen Contractors, danskit islandimiullu ingerlateqatigiiffiat Aarsleff-Ístak Joint Venture danskillu ingerlatseqatigiiffii marluk MT Højgaard A/S aamma Munck Gruppen A/S.

Namminersorlutik Oqartussanit aningaasassarsioraluartut

Kalaallit Airports Domesticip ingerlatseqatigiiffimmut ukioq manna maajimi isumaqatigiissusiortussaagaluarpoq.

Isumaqatigiissuteqartoqanngilarli.

Kalaallit Airportsip suliariumanninniartut marluk suliniummi sipaaruteqarnissamut isumaqatigiissuteqarfiginiarsimagaluarpai. Tamatuma saniatigut ingerlatseqatigiiffik suliariumanninniartut neqeroorutaannut, akisuunut matussusiisoqarnissaanut Namminersorlutik Oqartussanit aningaasassarsinissamut neriuuteqarsimagaluarpoq.

- Suliassami sipaarutissanik pisariaqartunik nassaarnissaq imaluunniit neqeroorummut akigititap appartinnissaa ajornartoq, ingerlatseqatigiiffiup paasivaa, taamatullu maannakkut neqeroorutit atorunnaarfissaat sioqqullugu aningaasalersuutissanik annertunerusunik neriorsuummik pissarsinissaq periarfissaqarsimanani, Kalaallit Airports tusagassiuutinut nalunaarummi allappoq.

Aappaagu misileeqqissasoq

Taamaalilluni ukioq manna pilersaarut malillugu sanaartorneq aallartinneqarnavianngilaq.

Kalaallit Aiportsip oqarnera naapertorlugu aappaagumut nutaamik suliariumannittussarsiuussinissamut suliarinissaa tullinnguuppoq.

AAMMA ATUARUK Mittarfiliortiternissaq Qaqortumi nuannaarutigineqarpoq

- Ingerlatseqatigiiffimmi aqutsisut maannakkut Namminersorlutik Oqartussat isumasioqatigalugit, aningaasartuutissat appartinnissaat siunertaralugu, suliassamut allannguutaasinnaasut suussusersiniarlugit suliaqarneq ingerlateqqissavaat Johannus Egholm Hansen oqarpoq, nangillunilu:

- Taamatullu suliassamut aningaasalersuutissanik annertunerusunik aningaasaliinissaq pillugu Namminersorlutik Oqartussat oqaloqatigineqarnerat ingerlatseqatigiiffiup ingerlateqqissallugu, taamaalilluni Qaqortumi mittarfiliassap 2021-imi nutaamik neqeroortitsivigineqarsinnaanera aammalu 2024-imi naammassineqarnissaa, naatsorsuutigineqarsinnaassalluni.

Qaqortumi mittarfissap sanaartornera piareerluni 2023-p naaneranit atorneqarsinnaanngortussaagaluarpoq.