Qallunaatsiaat oqaluffigisimasaat saanikuilu Narsarsuup eqqaani nassaarineqartut

- Sumiiffiup qallunaatsianut qanoq pingaaruteqarsimanera eqqarsaatigeqqittussanngorparput, ilisimatusarnermi aqutsisoq Christian Edelfelt Koch Madsen oqarpoq. 

Narsarsuup eqqaani Qinnguani illukut, qallunaatsiaat oqaluffigisimassagaat qangali eqqarsaatigineqartarpoq. 

Ilisimatusartulli uppernarsaatissaqarsimanngillat, tassa: oqaluffik iliveqarfitoqalik.

Ilisimatusartullu saanikunik, kangimut sammisunik, soorlu kristumiut ilisisarnerattuut ittunik maanna nassaarput. 

Tamanna Nationalmuseumi tusagassiuutinut nalunaarummi allappoq. 

- Tassa oqaluffiunera maanna uppernarsarsinnaanngorparput, ilisimatusarnermi aqutsisoq Christian Edelfelt Koch Madsen tusagassiuutinut nalunaarummi oqarpoq. 

- Inuit ujaqqanik qallerlugit ilineqartartut qallunaatsiaat oqaluffiit iliveqarfiini ilineqartarput, taamaammat takussutissat tamarmik allagaatillu assigiimmik takussutissiipput.

Nationalmuseum naapertorlugu oqaluffimmik qallunaatsiaat nalaanneersumik kingullermik ukiut 60-it matuma siorna nassaartoqarpoq.

Vikingit nalaanni oqaluffiit mikisut qimanneqapallattarput. Oqaluffillu nutaaq una anginerullunilu akullit nalaanni atugaasimarpasippoq.

Seqerngup qaqqaasa ataanni oqaluffik

Eqimattaq oqaluffitoqqamik nassaartoq ilisimatusartunik ukunanngaanneersunik inuttaqarpoq: Nunatta Katersugaasivia Allagaateqarfialu, Nationalmuseet, Bergenimi Universitetsmuseum aamma Unesco Kujataa.

Taakku qallunaatsiaat akulliit nalaanneersut pillugit allagaatit aamma misissorpaat, tassanilu nunatsinni oqaluffiit aqqi inissisimaffiilu eqqaaneqarput.

Uanilu 'Seqerngup qaqqaasa ataanni oqaluffik' (Kirkja undir Sólarfjöllum) nassuiaatigineqarpoq. Ilisimatusartut qaqqap inissisimaneri oqaluffiit inissisimanerannut naapertuussoraat.

- Oqaluffiup uuma inissisimanera allagaatini nassuiaatigineqartuni naapertuuttoq takutinneqarmat oqaluffinnik allanik allagaatini oqaluttuarineqartunik, sulili nassaarineqarsimanngitsunik ujaasinissaq pissusissamisoorpoq, Christian Edelfelt Koch Madsen oqarpoq.

Pissaaneqarnermi pissutsit nutaat

Qassiarsuup Erik Aappalaartup nalaani Brattahlíðmik taaneqartup eqqaani oqaluffiit arfinillit nassaarineqarput. Taakkunannga pingasut ukiut akulliit nalaanni atuupput.

Sumiiffimmi mikisumi oqaluffiit angisuut amerlassusaat qallunaatsiaat imminnut pissaaneqarniunnerannik takussutissiisoq, ilisimatusartut aqutsisuat oqarpoq.

Oqaluffiup nassaarineqartup nutaap eqqaani naatsiiviit marlunnik pingasunut amerlassuseqartut aamma nassaarineqarput, Nationalmuseumillu oqarnera naapertorlugu tamanna nunaqarfeeraqarsimaneranut takussutissaavoq.

- Sumiiffimmi tassani oqaluffinnik sanaartorneq, taamaalilluni pissaanermik inissisimaffimmillu takutitsinissaq unammissutigineqarsimasutut ippoq. Unamminermi ilaat ajorsarsimassapput, - uanilu oqaluffik assigalugu - immaqa taamaatitsiinnartoqartarsimalluni, Christian Edelfelt Koch Madsen oqarpoq.

- Nassaalli qanorluunniit ikkaluarpata qallunaatsiaat akulliit nalaanni agguataarnerat pissaaneqarnerisalu agguataarnerat nutaamik isiginniffigilerlugulu eqqarsaatigeqqittariaqarparput.