Nunatsinni qallunaatsiaat puisitortarsimasut
Qallunaatsiaat kinguaavi nunatsinniittut ukiut 500-t matuma siorna periarfeerunneqarput. Taamaammat sooq nunatsinni periarfeerussimanersut taannaqami eqqoriarneqaqattaalerpoq, ajunaarnersuit, silap pissusaata allanngoriartornera, qallunaatsiaallu Nunatsinni pissutsinut naleqqussarsinnaasimannginneri ilaatigut tammarnerinut pissutaatinniarneqartaraluarput.
Qallunaalli Canadamiullu ilisimatuui misissuimmata qallunaatsiaat puisit neqaannik nerisaqartarsimasut paasineqarpoq, tassalu qallunaatsiaat pissutsinut naleqqussarsinnaasimannginneri tammarnerinut pissuutaanngitsoq paasineqarluni.
Qallunaatsiaat saanikuisa 80-t kulstof 13 aamma kvælstof 15-imik akoqarneri Københavnip Universitetiani misissorneqarmata puisip neqitortarsimaqisut paasineqarpoq.
Qallunaatsiaammi siulliit Islandimiit Nunatsinnukarmata nersussuit, savat, savaasat puulukillu nassatarivaat. Nunasisummi naasorissaasuugaluarlutik piniartarneq takornartarinngilaat, ulluinnarnilu puisinniartarneq qallunaatsiaat atugarilipallassimallugu, piffissarlumi sivitsunngitsoq nunap inoqqaavisut puisituumatigilersimallutik.
Taamaammat ajunaarnersuit pissutaanatik qallunaatsiaat Nunatsinniittut nungussimanngitsut Københavnip Universitetiani Professorip Niels Lynnerup-ip ilimagilerpaa, akerlianillu qallunaatsiaat puisitukatalersimanerarlugit qimagussimanissai ilimagilerlugit.
- Qallunaatsiaat saanikuinik misissuinitsinni taakku Kalaallit Nunaanniit eqqissillutik qimagukkiartuaarsimaneri ilimanarsisippai. Qallunaatsiaammi ilerri Kalaallit Nunaanniittut kingullersaani arnartaqanngiusarput. Inuusuttummi Kalaallit Nunaanniit qimagussuutilersimapput, arnallumi meeqqiorsinnaasut ikiliartuinnartillugit inuiaat amerlassussaasa ataavartuutinneqarnissaa ajornarnerulertarmat, Niels Lynnerup oqarpoq.
Ilisimatuullu Aarhus Universitet-imeersut, Københavnip Universitet-imeersut, Danmarkip Katersugaasivissuaneersut, Islandip Universitetianeersut kiisaalu Canadami Vancouver-imi Simon Fraser University-meersut Carlsberg-illu aningaasaateqarfianit aningaasalerneqarsimasumi misissuinermik ingerlatsisuupput, misissuinerillu inerneri atuagassiami Journal of the North Atlantic-imi saqqummersinneqareerlutik.
