Qalasersuaq kiangaatsiartoq
DMI nittartakkamini taama allaaserisaqarpoq.
- Issittumi pisarnermit kiannerunera nalinginnaanngitsuuvoq. Tamanna Issittumi sumiiffiit ilaanni Kap Morris Jesupillu akornanni silaannaap kiassusaasa aporaannerannit peqquteqarsinnaavoq, DMI-mi silasiortoq, John Cappelen DMI-p nittartagaani allappoq.
Nunarsuulli avannarpasinnerusortaani silap pisarnermit kiannerunera qaqutigoortuuvoq.
DMI-p 1980-imi uuttortaasalernerminiilli taama kiannera assingusumik marloriarluni uuttoreerpaa. Siullermik 2011-mi aappassaanillu siorna 2017-imi.
Kap Morris Jesupimi februaarip qaammataani 1980-imiilli uuttortarneqartartoq agguaqatigiissillugu 32,9-inik issippoq.
AAMMA ATUARUK 2016 nunarsuarmi kiannerpaaffiusoq
TV2-p silasiortuata, Danny Høgsholdtip Issittumi sapaatip akunnerata naanerani kiangaatsiarnissaa siulittorpaa Danmarkimilu qerinnassanerarlugu.
Nunatta qanittuani naqitsiniisaffiup Islandimiit qalasersuup nalaanut illuariartornera pissutigalugu kiannerulissasoq, taanna allappoq.
Sapaatiuppat nunarsuup qatsinnerpaani nillissuseq qaangingajallugu kiassaaq. Kiassuseq taanna Issittumi februaarimi kiassuserineqartartumit nalinginnaasumit 30-t 40-llu akornanni kiannerussaaq.
- Taamaalilluni issittumi naliginnaasumit kiannerussasoq oqaatigineqarsinnaavoq, Danny Høgsholdt allappoq.
Qalasersuarmili sila sapaatip akunnerata tulliani nalinginnaasunngoqqissaaq, tassani 20-t 30-llu akornanni issilerpat qerinnarsissasoq naatsorsuutigineqarmat.
knr.gl/silassaq Inuit Qeqertaanut, Kap Morris Jesupip avannaaniittumut silasaaq maani KNR.gl-imi takuuk
AAMMA ATUARUK Baffinip Kangerliumarngani pissutsit allanngupiloorsinnaasut
AAMMA ATUARUK Issittumi illoqarfiit avatiminnut naleqqiullutik 5 gradinik kiannerusut
