Issittumi illoqarfiit avatiminnut naleqqiullutik 5 gradinik kiannerusut
Tamannalu Issittumi silap pissusiata siunissami qanoq innissaanik misissuinermut atorneqarsinnaavoq.
Ilisimatuut Norgemi Bergenimiittumi Nansensenterimeersut taama isumaqarput, Norgemi nuna tamakkerlugu tv-qarfik radioqarfillu, NRK, taama allaaserisaqarpoq.
Ilisimatuut norgemiut Issittumi silap kiassusianik nalunaarsukkat misissorsimavaat, Skandinaviallu avannaata Sibiriallu issittortaani illoqarfiit sumiiffinnut avatiminniittunut naleqqiullugit gradit tallimat angullugit kiannerusut nalunaarsukkani takuneqarsinnaavoq.
Nukissiuutinik atuineq sumiiffiit taakku kiannerunerinut pissutaavoq, aammali illoqarfinni silaannarmi pissutsit assigiinngitsut pissutigalugit illoqarfiit avataminnut naleqqiullugit kiannerupput.
Paasisallu taakku silap pissusianik ilisimatusartut silap pissusiata allanngoriartornerata kingunerisassai pillugit ilisimatusarnerminni atorluarsinnaavaat. Silap pissusiata allanngoriartorneranut siulittuutit takutippaat Issittumi sila ukiuni hunnorujuni marlussunni tullerni gradinit pingasunit tallimanut kiannerulissasoq.
Taamaammat issittumi illoqarfiit misileraavittut ilisimatusartunit atorneqarsinnaapput, illoqarfinnimi taakkunani silap kiassusia issittup siunissami kiassuserisassaatulli maanna kiatsigereermat.
Ilaatigullu naasut qanoq allanngoriartornersut aamma illut aqquserngillu nunap qeriuaannartup aakkiartorneranut tunngatillugu qanoq innersut ilisimatuut nakkutiginiarpaat.
