Baffinip Kangerliumarngani pissutsit allanngupiloorsinnaasut
Nunatsiaq News nittartakkamini taama allaaserisaqarpoq.
Kalaallit Nunaat Nunavuullu kangisissortaa ataatsimut isigalugu ukiut 2000-it qiteqqunneranni kiannerulissaaq, siallerajunnerulerluni aputikinnerusalissallunili anorlerajunnerusalissallunilu.
Immikkut ilisimasallit Issittumi nakkutilliinermik aamma nalilersuinermik suliniut AMAP, Arctic Monitoring and Assessment Programme, aqqutigalugu nalunaarusiorsimapput, nalunaarusiarlu apriilip ulluisa 25-anni saqqummiunneqarluni.
- Pissutsit siunissami allanngussapput. Baffinip Kangerliumarngani Davis Strædemilu misissuinermi inerniliussat takutippaat tamaani innuttaasut silap kiatsikkiartornera immallu kissatsikkiartornera malugissagaat, siallerajunnerulerlunilu aputikinnerusalissaaq, soorlu aamma anorlerajunnerulissasoq, AMAP-ip nalunaarusiaani taama ilaatigut allassimasoqarpoq.
Immap sikuata saannerulernissaa aamma aarlerisaarutigineqarpoq, aputikinnerusalernissaalu ilutigalugu aput sivisunerusumik atasarnavianngitsoq inerniliunneqarpoq, nunallu qeriuaannartup aannissaa ilimasaarutigineqarluni.
AMAP-imi suliniummik aqutsisut inerniliussatik Washington DC-p eqqaani Restonimi sapaatip-akunnerata massuma ingerlanerani ataatsimeersuartitsinerminni saqqummiutissavaat, Issittumi Siunnersuisoqatigiinni ilaasortat ministeriisa Fairbanksimi Alaskamiittumi maajimi ataatsimiinnissaat sioqqullugu AMAP saqqummiussiniarluni.