Qaasuitsumit kingornutassat 109 millionit koruuninik ikinnerusut
Borgmesteriusimasup Ole Dorphip 2017-ip naanerani nalunaarutigigaluarpaa Avannaata Kommunia aamma Kommune Qeqertalik Qaasuitsup Kommunerisimasaata karsimiittuutaanik 111 millionit koruuninik avitsillutik kingornussissasut. Kisianni akiligassat akilerneqareermata kingornussassat 109 millionit koruuninik ikinnerulerput.
Kommuuniusimasummi naatsorsuutaasa piareerneqarneranni naatsorsuutigisamit ajornerusumik ukiup naanerani inissittoqarpoq.
47,5 millionit koruuninimmi amigartoortoqarpoq.
AAMMA ATUARUK Kommunit nutaat millionerpassuassaat tammartut
Tamannalu missingersuutaasimasunit 35 millionit koruuninik amigartoorfiuneruvoq.
Missingersuutinillu sippuinerit allaffissornermik suliassaqarfimmi 12,9 millionit koruuninik, aamma inunnik isumaginninnermik suliassaqarfimmi 20,8 millionit koruuninik kiisalu sanaartornermik suliassaqarfimmi 9,6 millionit koruuninik sippuiffiunerpaasimapput.
Kommuunimi atorfilittat nassuiaatigivaat aningaasartuutit isertitallu ukiumut naatsorsuusiorfiusumut 2017-imut tunngassuteqartut, ukiup nikinnerata kingorna aatsaat akilerneqarsimasut imaluunniit ikineqarsimasut.
