Kommunit nutaat millionerpassuassaat tammartut
- Uggornaqaaq, Qeqertalimmi borgmesteri, Ane Hansen oqarpoq. Kommunitaamummi aningaasaqarnikkut aallaavissaq naatsorsuutigineqarsimasumiit ajornerungaatsiarsinnaavoq.
Decembarip naanerani 2017-mi tussagassiuutinut nalunaarummi, Qaasuitsup Kommuniani borgmesteriusimasup, Ole Dorphip ilisimatitsissutigaa, kommuuninut nutaanut marlunnut, Avannaata Kommunianut aammalu Qeqertalik Kommunemut karsi 111 mio. koruuninik imalik ingerlateqqillugu.
AAMMA ATUARUK Qaasuitsup Kommunia oqaluttuaannanngoruni 111 millioner kroninik qimataqassaaq
Aningaasalli taakku kommuniusimasumi torersaanermi atorneqarsimapput. Ane Hansen naapertorlugu akiligassanik ukiunik arlalinnik pisoqaassusilinnik nassaartoqarsimavoq.
Avannaata Kommuniata kingortussat isumalluutigigai
- Maannakkutut isikkoqartillugu, aningaasat amerlanerit atorneqarsimapput, akiligassannguinnarsinnaallutillu, taamak oqarpoq Ane Hansen.
Ukioq manna kommune aningaasanik atuinaveersaarsimanera nuannaarutigaa.
- Torersagassat amerlanissaat naatsorsuutigisimavara, annertussusaalli tupaallaatigisimavara. Qujanartumilli 2018-mut mianersortumik missingersuusiornikuuvugut, tamannalu nuannaarutigeqaara, Ane Hansen oqarpoq.
AAMMA ATUARUK Avannaata Kommunia missigersuutitigut amigartooruteqassaaq
Avannaata Kommunianut pissutsit ilungersunarnerusinnaapput, kommunemi 2018-mut 6 millionit koruunit missaannik amigartooruteqarluni ingerlatsinissani naatsorsuutiga. Tassunga atatillugu Avannaata Kommuniani kommunip pisortaa, Sivso Dorph Qaasuitsumiit kingornussassat innersuussutigai.
- Naatsorsiuutiginikuuvarput 57 millionit koruunit sinnilaarlugit Qaasuitsup Kommunianiit kingornussaqartussaalluta. Taamaalilluni ukioq mannamut 51 millionit koruunit inulaarlugit ukiup naanerani uninngasuuteqassalluta naatsorsuutigalutigu, Sivso Dorph oqarpoq.