Qaanaap mittarfianut aqqusineq isasoq: Aqqusiisoqarallartoq

Qaanaap mittarfianut aqqusineq sapaatit akunnerata siuliani pingasunngornermi siallerujussuarnerani isavoq.

Tamanna Qaanaap mittarfianut tassanngalu angallattoqarsinnaajunnaarneranut sunniuteqarpoq.

Taamaammat Ineqarnermut Attaveqaasersuutinullu Naalakkersuisoqarfik, Air Greenland A/S, Mittarfeqarfiit A/S taavalu Avannaata Kommunia qanoq iliuuseqalertortariaqarsimapput.

Tassa sanaartugassiissutinik Qaanaami suliaqartartullu marlunnik immikkoortulimmik aaqqiissuteqarallarput.

Ineqarnermut Attaveqaasersuutinullu Naalakkersuisoqarfik tusagassiorfinnut taama nalunaarpoq.

Aqqusiaagallartoq qajannartoq

Tassa siullermik mittarfimmut tassanngalu angallaviusinnaasumik aqqusiisoqarallarpoq.

Taanna sila allanngoraqimmat Qaanaamut mittoqarnerata tassanngalu aallartoqarnerata kingorna tamatigut isumannaarneqarlunilu aaqqissorneqartassaaq. Sanaartugassiissutinik Qaanaami suliaqartartut Mittarfeqarfiit A/S suleqatigalugit tamatuminnga isumaginnittuussapput.

Biilit assakaasunik sisamanik ingerlatilliinnaat aqqusiaagallartukkooqqusaagallarput. Tassa orsussamik assartuussuit tassuunaaqqusaanngillat.

Taakkuali orsussamik mittarfimmut assartuisariaqalertinnagit sapaatit akunnerata tulliani aqqusiniaagallartukkoorsinnaalernissaat ilimagigitsik, naalakkersuisoqarfik allappoq.

Aappaagu aasap tungaanut atuukkallartussamik aqqusiniortoqassasoq

Aappaagu qajannaannerusumik aqqusiniortoqarnissaata tungaanut atuukkallartussamik aqqusiniortoqassaaq.

Aqqusiniugallartussaq qanoq qajaannartigisunngorlugu suliarineqassanersoq, Ineqarnermut Attaveqaasersuutinullu Naalakkersuisoqarfik sanaartugassiissutinillu Qaanaami suliaqartartut misissuleruttorpaat.

Aqqusiniugallartussarmi biilinit oqimaatsunit, aamma uppernaaru aattulernerani, ingerlaarfigineqarsinnaanissaa pingaarpoq.