Ulapputaasoq: Qaanaap mittarfianut aqqusineq isasoq

Qaanaap mittarfianut aqqusineq sisoorluni isavoq. 

Tamanna Qaanaap mittarfianut tassanngalu angallattoqarsinnaajunnaarneranut sunniuteqarpoq.

Ineqarnermut Attaveqaasersuutinullu Naalakkersuisoqarfik tusagassiorfinnut taama nalunaarpoq.

Qaanaap mittarfianut aqqusineq maanna matoqqasoq marulluinnanngorluni maniilalerlunilu isasimasoq, assini videomillu immiussani Facebookimi siammartikkani ersippoq. Qaanaami politiit aqqusernup eqqaanut qanillattoqqusinngillat.

Qulimiguulimmik angallanneqartut

Qaanaamut tassanngalu timmisartuussinissanik taamaatitsisoqaqqunagu naalakkersuisoqarfik Avannaata Kommunia, Mittarfeqarfiit A/S aamma Air Greenland A/S suleqatigalugit aaqqiissutissarsiorpoq. Sapaatit akunneranni matumani timmisartuussinerni tikittunik aallariartortunillu angallassinissamik aaaqqiissuteqareerlutik, naalakkersuisoqarfik ilisimatitsivoq.

Tassa qulimiguulimmik angallassissallutik, Air Greenland KNR-imut ilisimatitsivoq. 

- Aappagu assingusumik pisoqaqqunagu sanaartugassiissutinik suliaqartartunik aqqusinermik isasumik aamma takuniaajartortussarsiorpugut. Ukiangajalereermat atortussanik angisuunik umiarsuakkut Qaanaamut nassiussinissaq kingusippallaarmat attanneqarsinnaasumik ukioq manna aaqqeeriaannaasoqanngilaq, naalakkersuisoqarfik allappoq.

Ineqarnermut Attaveqaateqarsuutinullu Naalakkersuisoqarfik tamatumunnga tunngatillugu tusagassiorfinnut nalunaaruteqaqqittarumaarluni nalunaarpoq.