Qaanaap kommunea naalakkersuisunit ikiorneqalerpoq

Allattoq Jaaku Lyberth
novembarip 08-at 2006 07:45

Qaanaap kommuneata aningaasatigut ajornartorsiuteqarnera pillugu naalakkersuisunit ikiorniarneqalerpoq. Aningaasanut inatsimmi siunnersuummi Qaanaap kommunea, 7 millioner koruuninik atorniarsinnaanissaanut immikkoortitsisoqarnissaa siunniunneqarpoq. Tamannali piumasaqaatitaqanngitsuunngilaq.

Qaanaap Kommunea ullummikkut aningaasatigut ajornartorsioqartupilussuuvoq. Tamanna inatsisartuni ilaasortat arlallit nammineerlutik uppernarsarnikuuvaat. Esmar Bergstrøm augustip qaammataani naalakkersuisunut apeqquteqaateqarpoq, Qaanaap kommuneata aningaasatigut ajornartorsiuteqarnera anigorniarlugu qanoq iliuuseqarniarnersut. Esmar Bergstrøm-ip isumaa malillugu Qaanaap kommuneata akiligassani akilissagunigit 7 millioner koruuninik pisariaqartitsissasoq. Naalakkersuisunut apeqquteqaat augustip ulluisa qulingiluaani akissuteqarfigineqarpoq, akissuteqaammilu naalakersuisut immikkut ittumik ikiorsiinissamut pilersaaruteqarnatik akissuteqarput. ” Qaanaap kommunea aningaasatigut ajornartorsiuteqarnini namminneerluni iluarsiniarsinnaavaa, ilaatigut Ilulissat kommunea suleqatigalu” naalakkersuisut akissuteqarnerminni ilaatigut taamatut akissuteqarput. Qaammalli ataaseq qaangiummat taamatut isummerneq allanngorpoq. Naalakkersuisut siulittaasuat Hans Enoksen nammineerluni Qaanaamiippoq. Qaanaallu kommunea naalakkersuisunit 7 millioner koruuninik atukkerniarneqalerpoq, tamanna aningaasanut inatsisip aappaasaaneerlugu oqallisigineqarnissaani takuneqarsinnaalluni. 7 millioner koruuninik atorniarsinnaaneq piumasaqaatitaqarpoq tassami Qaanaap kommunea kommunimik allamik suleqatissarsiussaaq, aningaasatigut aqutsisinnaanissaq pillugu. Taassuma saniatigut Naalakkersuisut piumasaraat kommunalbestyrelsep iliuuseriniagaat Namminersornerullutik oqartussanit akuerineqarnissaat.

Tassalu allatut oqaatigalugu Qaanaap Kommunea nakkutigineqalersussaavoq. Apeqqutaaginnalissaarlu nunatsinni kommunit avannarlersaata siunissaa qulakkeerneqarnersoq. Naalakersuisullu qanoq iliuuseqarniarnerat inatsisartuni ilaasortamut attaviitsuusumut Esmar Bergstrøm-imut pingaarneruvoq.