Qaanaami mittarfimmut aqqusineq iluarsineqartoq
Qaanaami mittarfiup tungaanut aqqusineq 23. aggusti siallerujussuarneranik pissuteqartumik ajoquserpoq. Illoqarfiup mittarfiullu akornanni inunnik assartuineq taamaammat unitsinneqarallarpoq.
Sapaatip akunninngulersoq ajutoornermi aqqutissaliortoqarpoq inuit biilerlutik siumut utimullu ingerlasinnaalersillugit.
Taamaalimmalli Ineqarnermut Attaveqaasersuutinullu Naalakkersuisoqarfik ilisimatitsivoq utaqqiisaasumik aqqusinniortoqassasoq aasap tulliata tungaanut atasussamik, taamaalippat ataavarnerusumik aaqqiissuteqartoqassammat.
Utaqqiisaasumillu aqqusineq maanna atorneqalernissaminut piareerpoq.
Taama Ineqarnermut Attaveqaasersuutinullu Naalakkersuisoqarfik tusagassiorfinnut nalunaarummi allappoq.
- Qaanaami najukkami entreprenøri, sukkasuumik nutaaliorlunilu illoqarfiup mittarfiullu akornanni nutaamik aqqusinniorluni iluatsittumik suliarinnittoq, qutsavigerujussuarparput.
- Aqqusineq nutaaq taanna Qaanaami innuttaasunut pingaaruteqartorujussuuvoq inaarutaasumillu aqqusinniortoqarsinnaalernissaata tungaanut taakkua mittarfimmukarsinnaanissaat mittarfimminngaaniillu aqqutissaqarsinnaanissaat qulakkeertussaallugu, Ineqarnermut Attaveqaasersuutinullu Naalakkersuisoq Hans Peter Poulsen (S) tusagassiorfinnut nalunaarummi oqarpoq.
Atortut illoqarfimmeereersut atorlugit Qaanaap illoqarfiata mittarfiullu akornanni entreprenøri aqqusinniorpoq.
Ataavartumik aaqqiissutissami immikkualuttut kingulliit suli inissinngillat aasarnissaatali tungaanut tamanna naalakkersuisoqarfimmit suliarineqassalluni
