Qaanaami akunnittarfiutilik Nersornaaserneqartoq
Birthe Jensen Qaanaami hotelimik ukiorpassuarni ingerlatsisoq, Qaanaami juumuutut suliaqarsimasoq ukiunilu kingullerni qulini Red Barnetimi siulittaasuusimasoq Namminersorlutik Oqartussanit sølvimik nersornaaserneqarpoq.
Namminersorlutik Oqartussat tusagassiuutinut nalunaarummi allapput.
Nersornaat Inatsisartut siulittaasuannit, Mimi Karlsenimit (IA) tunniunneqarpoq. Taassuma oqalugiarnermini Birthe uinilu Qaanaami hotelimik ingerlatsinerminni suliffisarpassuaqartitsisimasut ilaatigut erseqqissaatigaa.
Hoteli coronamik tuniluutingaatsiartoqarnerata kingorna matusariaqarsimavoq, tamannalu Mimi Karlsenip aamma oqaasertalerpaa:
- Tamatuma kingunera illoqarfimmut tikeraartilluta unnuiffissarsiortarnitsinni neriniartarfissarsiortarnitsinnilu ullumikkut tamatta malugisaratsigu. Naatsumik oqaatigalugu hoteli taanna amigaatigaarput, Inatsisartut siulittaasuat Birthe Jensenimut oqalugiarnermini oqarpoq.
Suliarisimasai arlallit
Hotelimik ingerlatsinerup saniatigut piumassuseqarluarluni suliniuteqartoq illoqarfimmi Qaanaami najugaqarfiusunilu eqqaani juumuutut aamma suliaqarsimasoq Inatssisartut siulittaasuata erseqqissaatigaa.
- Najukkanni inuiaqatigiinni annertuumik ataqqineqarputit innuttaaqatinnillu, inuusuttunik utoqqarnillu, nuannaartitseqataasarlutit, Mimi Karlsen oqarpoq.
Nersornaat sølviusoq tunniussiffigineqartunut pigiliutsinneqartarpoq. Nersornaalli kuultiusoq tunniunneqarsimappat taanna tigusisup toqunerata kingorna Namminersorlutik Oqartussanut tunniunneqaqqittussaalluni.