Tunumi palasi Inatsisartunit nersornaaserneqartoq
Inatsisartut siulittaasuata Mimi Karlsenip James Ignatiussen Tasiilami Hotel Angmagssalimmi arfininngormat nalliuttorsiorpalaartumik katerisimaarnermi sølvimik nersornaaserpaa.
James Ignatiussen Tasiilami ulluinnarni palasiusoq Tasiilami palasitut sulinermini aammali sunngiffimmini suliaqarnikkut suliaqangaatsiarsimanera pissutigalugu nersornaaserneqarpoq.
Inatsisartut nittartakkaminni allapput.
Tivaneq uummammiorigaa
Tunniusimalluarneralu Mimi Karlsenip oqalugiarnermini erseqqisaatigaa.
- Innuttaasutut tunniusimalluinnarlutit Tasiilami piorsarsimassutsikkut peqatigiiffilerilermi eqeersimaarlutit peqataanerit nunaqqatinnit – aamma Tasiilap avataaneersunit – ilisimaneqaatigaat. Peqatigiiffilerinikkut assigiinngitsorpassuartigut tunniusimasuuvutit, tamatumunngalu ilanngullugu erinarsoqatigiinni aqutsisuullutit erinarsoqatigiinnilu tivaneq akuutittarlugu.
- Tivanermik ilisimasavit kinguaannut ingerlateqqqinnissaat ilungersuullugu sulissutigisimavat, taamaaliornikkullu tunumiut inooriaasitoqaannik kinguaariinnut tullinnguuttunut ingerlatitseqqillutit, Mimi Karlsen oqarpoq.
