Kommunefogediusimasoq najukkamilu politikeriusimasoq sølvimik nersornaaserneqartoq

K’aerngâk Nielsen inuusuttuulluni qimusserluni Upernavimmut isikkamik arsariartarsimavoq. Taanna maanna sølviusumik Nersornaaserneqarpoq.

Allattoq Hanna Vestergaard Hviid

januaarip 26-at 2024 11:58

Inatsisartut siulittaasuata Mimi Karlsenip Nersornaat sølviusoq K’aerngâk Nielsenimut ippassaq tunniuppaa.

Taanna Savissivimmi inuiaqatigiinni suliaqartarsimanini tamarmik nersornaaserneqassutigai.

Inatsisartut siulittaasoqarfia tusagassiuutinut nalunaarummi allappoq.

NERSORNAAT

Nersornaasiunneqartartoq saqqarmiuuvoq nersornaat.

Taanna Inatsisartut siulittaasuannit tunniunneqartarpoq.

Nersornaat innuttaasunut tamanut nunatsinni piffissami sivisuumi pingaarutilinnik suliniuteqarsimasunut nersortarialinnut tunniunneqartarpoq, tamatumanittaaq kalaallit oqaasii, kulturiat, isigineqarnerallu pillugu annertuumik nersortarialimmik suliniuteqarsimasumut tunniunneqarsinnaavoq.

Nersornaat guldtiusoq sølviusorlu nersornaasiissutigineqartarput.

Nersornaat guldtiusoq ukiumut ataasiaannarluni tunniunneqartarpoq.

Nersornaat sølviusoq annerpaamik ukiumut tallimariarluni tunniunneqartarpoq.

Allisiguk

Taanna 70-ikkuni ukiuni tallimani kommunefogediuvoq, 1975-imiit 1987-imut kommunalbestyrelsimut ilaasortaavoq ukiorpassuarnilu ilagiit sinniisaanni ilaasortaasimalluni.

Savissivimmi inunngorputit sulilu Savissivimmi najugaqarlutit piniartutullu inuussutissarsiuteqarsimallutit sulilu piniartuuneq ingerlallugu, Mimi Karlsen K’aerngâk Nielsenimut oqalugiarnermini oqarpoq.

K’aerngâk Nielsenimulli nersornaasiineq ileqqumit allaanerulaarpoq, tassami nersornaat Nuup Savissiviullu akornanni videoliuutikkut attaveqarnikkut tunniunneqarpoq.

Nunaqarfiup siulersuisuini siulittaasoq Hans Karlsen Savissivimmi Nersornaatip tunniunneqarnerani ikiuuppoq.

Naalakkersuisut siulittaasuata K’aerngâk Nielsenip qimussernermi piginnaasaqarnera ilaatigut erseqqissaatigaa, taannami ukiut ingerlanerini qimussernermi arlaleriarluni ajugaasimavoq, inuusuttuunerminilu isikkamik arsariartorluni Upernavimmut qimussertarfimalluni.

Aamma atuarukKilisaataatilik kuultiusumik nersornaaserneqartoq

Mimi Karlsenittaaq K’aerngâk Nielsenip nuliarigalua, Theresia Nielsen eqqaavaa.

- Ukiorpassuarni nunaqarfinni sulisimaninni illit nuliallu nunaqqatissinnut aalajaallusi ikorfartuisarsimavusi. Inunnut sanngiinnerusunut annertuumik ikorfartuisarsimavusi.

Namminersorlutik Oqartussanit Nersornaat nunatsinni immikkut ittumik suliaqarsimasunut tunniunneqartarpoq.

Nutaarsiassami kukkunermik nassaarsimaguit uunga allaffigineqarsinnaavugut.