Tasiilami suliffissaaleqisut amerliartortut: - Qaammatit tamaasa ilaasortaajunnaartoqartarpoq

Nutarterneqarpoq 27/05-25: KNR-ip assiliisup aqqa kukkusumik siuliani allattoorpaa. Kukkunerput utoqqatsissutigaarput. 

Tasiilami suliffissaaleqisut amerligaluttuinnarput. Suliffeqarfiit arlallit soraarsitsisariaqarnikuupput, soraarsitaasullu ingerlaannaq suliffissarsisinnaaneq ajorlutik.

Politikkikkut ineriartornermi Tunu puigorneqartoq amerlasuunit misigineqarpoq. Taamaammat Tasiilami aqqusinermi inuit 600-ngajalluinnaat naammagisimaarinninnginnertik maajip 18-iani takutippaat.

Sulinermik Inuussutissarsiuteqartut Kattuffiata (SIK) Tasiilami immikkoortortaqarfia akerliussutsimik takutitsisunut tapersiivoq, pisullu ilungersunarluinnarnerat uppernarsarlugu.

– Suliffeqarfiit ikiligaluttuinnarput, tamanna ilaasortaqassutsitta amerlassusaani toqqaannartumik takusinnaavarput, Tasiilami SIK-p siulittaasua Justine Kalia, oqarpoq.

Tasiilami eqqaanilu suliffissarsiortutut nalunaarsoqqasut amerleriangaatsiarput. 2023-mi 139-upput. Ullumikkut 286-iupput – tassa Naatsorsueqqissaartarfiup allattorsimasuutai naapertorlugit marloriaatai sinnerlugu amerlanerulerput.

Peqatigiiffimmiit ilaasortaajunnaartut

SIK Tasiilaq siornatigut 270-inik ilaasortaqarnikuuvoq. Maannakkut ilaasortat 200-t sinnilaaginnarpai.

– Suliffeeruttoqarnerit tamaasa ilaasortanik aamma annaasaqartarpugut. Qaammatillu tamangajaasa tamanna pisarpoq, Justine Kalia oqaluttuarpoq.

Taassuma peqqutit arlaliunerarpai. Kommunit kattunneqarnerisa malitsigisaanik Tasiilami kommunip ingerlatsiviani sulisut ikinnerulerput, Tusassillu soraarsitsinerata kingorna ajornerulerpoq. Taannaannaanngilarli:

– Suliffeqarfiit allat aamma sulisunik ikilisaasut tusarpara. Ajornartorsiut naaffeqanngilaq, illoqarfiullu ingerlariaqqinnissaanut ajornartitsivoq, Justine Kalia oqarpoq.

"Mattunneqarnissaq kissaatiginngilarput, ineriartortitsisoqarnissaali kissaatigaarput"

Akerliussutsimik takutitsinermik aaqqissuisut oqarnerat naapertorluguit, sapaammi akerliussutsimik takutitsineq Tunumi ajornartorsiutit ukiorpassuarni ineriartornerannut qisuariaataavoq – angallannikkut  pissutsit ajornerat, ilinniartitsisussaaleqineq, inissaaleqineq, internetip naammaginannginnera, maannalu suiffissaaleqinerup annertusiartornera.

– Kingulliunneqarnerup tamakku kingunerai. Illoqarfik ineriartunngilaq, aaqqissueqataasoq, Iddimanngiiu Jensen Bianco, sapaatiummat oqarpoq.

Tasiilami inuussutissarsiortoq, Hotel Angmassalik-mik ingerlatsisoq akerliussutsimik takutitsinermi aamma peqataavoq:

– Naammaleqaaq. Tunumik mattussineq kissaatiginngilarput, ineriartortitsisoqarnissaali kissaatigaarput. Uaguttaaq maaniinnerput ersersittariaqarparput, taanna KNR-imut siusinnerusukkut oqarpoq.

Aalisakkerivik neriuuteqalersitsisoq

Tunumi oqariartuutigineqartoq Nuummi arajutsineqanngilaq. Inatsisartut illorsuata silataaniittuni majuartarfinni inuit 80-it 100-llu akornanni akerliussutsimik takutitsineq tapersersorlugu peqataapput, Naalakkersuisullu siulittaasuat, Jens-Frederik Nielsen (D) aamma takkuppoq.

– Tunumi ineriartornerup arriippallaarnikuunera ilumoorpoq, tamannalu iliuuseqarfigineqartariaqarpoq. Pimoorullugillu taakku suliarerusuppagut, taanna Sermitsiamut oqarpoq.

Naalakkersuisooqatigiit isumaqatigiissutaat naapertorlugu attaveqaatit pitsaanerulernissaat, aalisarnerup ineriartortinneqarnissaa, suliffissanillu amerlanerusunik pilkersitsinissaq ukkatarineqassasut, taassuma erseqqissaatigaa.

Justine Kalia allarpassuillu neriuuteqalaalerput. Illoqarfik nutaamik aalisakkerivittaalerpoq. Kisianni taanna piviusorsiorpoq:

– Aalisakkerivittaalernerput qujamasuutigisorujussuuarput. Kisianni ajoraluartumik suliffissat aallaqqaammut quliinnaasussaapput.  Piffissap ingerlanerani amerlanerulernissaat neriuuutigaarput.