Pujortartarunnaarsitsinialerput

Danmarkimi pisortat namminersortullu suliffeqarfiutaanni pujortartarneq aappaagu apriilip aallaqqaataani atuutilersussamik inerteqqutaalissaaq.

Suliffeqarfinni pujortaqqusiunnaalersitsisussamut siunnersuummut Folketingimi amerlanerussuteqarluartut akuersereertullu, isumaqatigiissut nunap iluani pissutsinut peqqinnissamullu ministeriutigisumit Lars Løkke Rasmussenimit saqqummiunneqarpoq.

- Pisortat namminersortullu suliffeqarfiutaanni pujortaqqusiunnaarnissamik isumaqatigiittoqarneratigut pujortartarunnaarnissamut suliniutillit malunnarsilluarput, peqqinnissamut ministeri Lars Løkke Rasmussen oqarpoq.

Isumaqatigiissulli killeqarpoq. Pujortarfiusinnaasussanik ininik pilersitsisoqarsinnaavoq, allaffiilu kisermaassat pujortarfiusinnaassaapput.

Imerniartarfinni ini 40 kvadratmeterit sinnerlugit annertussuseqarpat pujortaqqusiunnaartoqartalissaaq.

Suliffeqarfinni pujortartarunnaaqqussut Danmarkimi uummalluttut peqatigiiffiannit Danmarks Hjerteforeningimit ilassiorneqarluarpoq, pitsaanerusinnaagaluartorli aamma oqaatigineqarluni.

Peqatigiiffiup siulittaasua Susanne Volqvartz siunnersuut iluaralugu oqarpoq, sukannernerusinnaasimagaluartorli oqaatigalugu.