Tarnimikkut napparsimasut kommunit paaqqinniffiiniittut
Tarnimikkut napparsimasut amerlanerpaat ima peqqissitigisarput, allaat kommuniniit inissaminnik neqeroorfigineqartarlutik. Dronning Ingridip napparsimavissuata tarnimikkut nappaatilinnut immikkoortortaqarfiani peqqissaasuuneq Ann Birkekær Kjeldsen taama oqarpoq:
- Katsorsartinneq nakkutigilluaraanni, pitsaaasumik inuuneqaleqqittoqarsinnaavoq. Uninngasullumi amerlanerit angerlartinneqartarput, namminerisamillu angerlarsimaffimminnut angerlartarlutik, tarnimikkut nappaatilinnut immikkoortortaqarfimmi peqqissaasuuneq Ann Birkekær Kjeldsen oqarpoq
Nammineq ineqarsinnaalluarput
Kommuneqarfik Sermersuumi Isumaginninnermut ingerlatsiviup innarluutilinnut, inuiaqatigiinnilu tarnimikkut nappaatilinnut immikkoortortaqarfiani Allison Hansen pisortaavoq.
Aamma atuaruk Tarnip nappaataannut nakorsaq: Sakkortuumik tarnimikkut napparsimasut sioorasaarinissaat pinngitsoortissinnaanngilarput
Taassumalu kommunip inuttaasunut tarnimikkut innarluutilinnut suut neqeroorutigisarnerai nassuiaatigaa.
- Siullertut nammineq ineqarsinnaalluarput, qinnutigigunikkulu kommunimiit ikorfartorneqarsinnaallutik, Allison Hansen oqarpoq.
Namminermi ineqarlutik piffissap ilaani ikiorneqarunik innuttasutut allatut ingerlasinnaapput. Aamma killilimmik sulisulinnik illoqatigiiffeqarpoq, ineqatigiiffeqarlunilu, ineqartut akunnerni 24-ni nakkutigineqarfiannik, Allison Hansen oqaluttuarpoq:
- Illoqatigiinnimi ulloq unnuarlu sulisoqarfiusuni najugaqarnissamik pisariaqartitsisunut neqeroorutissaateqarpugut immikkoortortami pisortaq oqarpoq.
Aamma atuaruk Angutip inini iserfigitsaaliorsimavaa
Skizofrenertunut paaqqinniffimmik peqarpoq
Nuummi GU-mut sioorasaarisutut pasineqartoq malersorneqarsorisarluni skizofrenimik nappaateqarpoq.
Tarnimikkullumi nappaateqartunut ulloq unnuarlu paaqqinniffiit taamaattunut naleqqulluartuusut, peqqissaasuuneq Ann Birkekær Kjeldsen oqarpoq:
- Aamma skizofreneqartunut ulloq unnuarlu paaqqinniffinnik immikkuullarissunik peqarpoq.
Tarnimikkut nappaatilinnut immikkoortortaqarfik peqqissaasuuneq napertorlugu kommunillu qanimut suleqatigiikkaluartut, tarnimikkut nappaatillit namminneq peqqinnissaqarfiulluunniit saaffiginninneratigut aatsaat ilisimalertarpugut, Allison Hansen erseqqissaavoq.
- Paaqqinniffinnik atuisuunngitsunik amerlasuunik nalunngisaqarpugut. Aammali aqqusinermiit isertiinnarsinnaanngilagut. Atuisummi nammineq piumassuseqarunik neqeroorutigisatsinnik aatsaat atuisinnaapput, Allison Hansen oqarpoq.
