Tarnip nappaataannut nakorsaq: Sakkortuumik tarnimikkut napparsimasut sioorasaarinissaat pinngitsoortissinnaanngilarput

Dronning Ingridip Napparsimmavissuani tarnimikkut napparsimasut uninngavianni nakorsaaneq, Pia Glyngdal, taama naliliivoq.

Sakkortuumilli tarnimikkut napparsimasut, soorlu skizofreniimik nappaatillit, taama ilinnginnissaat anguniarlugu ikiorniartarpagut, oqarpoq:

- Maani napparsimasunut attaveqartarnerput assigiinngitsusigut ingerlasarpoq. Siullertut maani Sanami nakorsiartarfimmut saaffiginnittoqarsinnaavoq, aappattut tarnikkut nappaatilinnut sullissivimmut Ikaarsaarfimmukartoqarsinnaavoq, Nuummiinngitsullu, nunaqarfinni illoqarfinnilu allani, napparsimmavimminnut tarnikkut napparsimasunut attaveqarfissanut saaffiginnissinnaapput, tarnimikkut napparsimasut uninngavianni nakorsaaneq, Pia Glyngdal, oqarpoq.

Aamma atuaruk Siorasaarisutut pasisaq ulluni 25-ni tigummigallagaassaaq

Suleqatiginnikkusussusaat apeqqutaasorujussuuvoq

Tarnimikkulli napparsimasup suleqatiginnikkusussusaa ikiuinermut apeqqutaasorujussuuvoq, naaggaarsinnaappummi, tarnimikkut napparsimasunut uninngavimmi peqqissaasuuneq, Ann Birkekær Kjeldsen, oqarpoq:

- Takusinnaavara tarnikkut nappaatilinnut sullissivinni sinerissami maanilu, napparsimasunik attaveqarneq anguniarlugu iliuuseqartartut. Kisiannili napparsimasoq attaveqarusunngippat tamanna ajornakusuussaaq, tarnimikkut napparsimasunut uninngavimmi peqqissaasuuneq, Ann Birkekær Kjeldsen oqarpoq.

Tarnimigullu napparsimasoq piumanngippat taava tarnikkut nappatit pillugit inatsisip 2012-imeersup pinngitsaaliissummik unitsitsisinnaanermik periarfissilaarpaatigut, Ann Birkekær Kjeldsen nassuiaavoq:

- Tarnimigut nappaatilik sakkortuumik nappaateqarluni uninngasimaguni taava ataqatigiissumik pilersaarusiortarpugut, isumaqatigiissusiorsinnaallutalu nakorsaatitik unitsissagaluarpassuk pinngitsaaliissummik unitsissinnaassagigut. Tassa taanna periarfissaq atorsinnaasarput, Ann Birkekær Kjeldsen oqarpoq.

Aamma atuaruk Angutip inini iserfigitsaaliorsimavaa

Ilaqutaasut saaffiginninnissaminnut pisussaatitaapput

Pinngitsaaliissummillu unitsitsisinnaaneq ilaqutaasut ikiuinerannit aamma pisinnaavoq, taakkumi inatsit malillugu napparsimmavimmut saaffiginninnissaminnut pisussaatitaapput, soorlu ilaqutaq tarnimigut napparsimasoq nammineerluni ikioqqunngippat.

Peqqissutsimut Naalakkersuisup Doris Jakobsenip KNR-imut tamanna ersarissarpaa:

- Ernumassuteqaraanni ilaa soorlu tarnimikkut nappaatilinnik imaluunniit ilaqutaalluni taava ilaqutaagaanni ernumalluni saaffiginnittoqarsinnaavoq napparsimavimmut taanna sinnerlugu. Aamma taanna periarfissaavoq, Doris Jakobsen oqarpoq.

Aamma atuaruk VIDEO Nuummi GU-mut aallaasersornissamik sioorasaarisoqarnera pissutigalugu politiit qimagussortitsisut

GU-mi sioorasaarineq pinngitsoortinneqarsinnaasimanngilaq

Pinngitsaaliissummik unitsitsineq sakkortuumik tarnimikkut napparsimasunut atoraluarutsiguluiunniit sapaatip akunnerata naanerani pisut pinngitsoortinneqarsinnanngillat, tarnip nappaataannut nakorsap Pia Glyngdalip erseqqissaassutigaa:

- Inuttut pisinnaatitaaffiit eqqortissagutsigit taamaaliorsinnaanngilagut. Tassalu taannarpiaq tarnikkut nappaatilinnik sullissinerup nalorninartoqarfia. Aappaatigut iliuuseqarpallaassanngilagut aappatigullu iliuuseqanngippallaassanngilagut. Isumaqarpungalu sapaatip akunnerata naanerani pisup takutikkaa, napparsimasup qanorpiaq ikiorsinnaanera ilaannikkut nalusaripput. Isumaqarpunga allatut iliorsimasinnaanngitsugut, inuugatta, taamaammallu siumut ilimagereerneq ajornarluta, taamaanngippat maskiinaassagaluaratta. Dronning Ingridip Napparsimmavissuani tarnimikkut napparsimasut uninngavianni nakorsaaneq, Pia Glyngdal, taama oqarpoq.