Angutip inini iserfigitsaaliorsimavaa
Tamanna inatsit tunngaviusoq naapertorlugu Nuummi eqqartuussivimmi sapaatiummat ullup qeqqanut killisiuinermi erserpoq.
Angut maanna pasineqartoq najuutsinnagu sassartinneqarpoq, Dronning Ingridip Napparsimmavissuani tarnikkut nappaatilinnut immikkoortoqarfimmut pinngitsaaliissummik unitsinneqarsimanera peqqutigalugu. Tassami nakorsaq naliliisimavoq, angut eqqartuussivimmi najuussinnaanngitsoq - tamannalumi aamma unnerluussisussaatitaasup angutillu illersuisuata isumaqatigaat.
Aamma atuaruk Pasineqartoq inimini aallaaseqarpoq
Unnerluussisussatitaasoq, politimesterip tullersorta, Morten Nielsen, nunatta politiivi sinnerlugit tunngaviusumik inatsit naapertorlugu killisiuinermi saqqummiussisuuvoq, eqqqartuussivimmilu suliaqarnermi angutillu maanna pasineqartup tigusarineqarneranit nalunaarusianik atuaasaqattaarluni.
Tassannga erserpoq, pasisaasup inini pequttanik allunaasanillu atortulerluni iserneqatsaaliorsimagaa, taavalu aamma inaa tukaqisoq.
Aamma atuaruk Angut Kongevejimi tigusaavoq
Politiit inissiami aamma petruliumik benzinamillu saliissutissiamik nassaarput, aallaammilliuna kipisamik nassaaramik, toqutseriarsimasutut pasillugu eqqartuussivimmut tunniukkaat. Unnerluussisussaatitaasoq Morten Nielsen eqqartuussivimmi suliaqareernermi taama oqarpoq:
- Pasinnissutigisarput tassaapput, ilaatigut aallaammik kipisamik pissarsisinnarluni atuarfimmi aallasersornissamik piareersaateqarluni toqutseriarsimaneq, Morten Nielsen oqarpoq.
Aamma atuaruk ASSIT Nuummi Kongevej 11 suli assersugaavoq
Unnerluussisussaatitaasup eqqartuussivimmiinnermi aallaat kisiat saqqummiutinngilaa, aallaasip eqqua pilattugaq aamma inissiami nassaaq aamma takusassanngoramiuk. Politiit inissiami arfininngornermi unnunnerusukkut misissuinerminni aamma qiuutinik isaterlugit saviliarineqarsimasunik nassaarput.
Sioorasaarut, politiit Nuummi GU-miit eqqqaanilu meeqqerivimmiit tallimanngornermi ullup qeqqaani ilaatigut qimagutsitsillutik iliuuseqalernerannut peqqutaasoq, eqqartuussivimmi atuarneqarpoq.
Sioorasaarummi USA-mi Colombine High Schoolimi atuartunut 1999 eqqaassineq eqqartorpaa. Pisimasoq taanna pasisap GU-miitilluni atuagaanut ilaavoq, allakkani naggasersimavaa ”who's next - maybe you're next”. "Kina tulliussava - immaqa illit".
Aamma atuaruk Nuummi Qeqqata ilinniarnertuunngorniarfiani siooraneq qaangiuppoq
Sioorasaarut GU-mi ilinniartitsisumut arnamut tallianngornermi ullup qeqqata siorna nassiunneqarsimavoq. Arna ilinniartitsisoq taanna pasisaq ilinniartuugallarmat tassunga attuumassuteqartuusimavoq.
Pasisaasumut arlaatigut attuumassuteqarsimavoq ilisarisimalluarlugulu, Morten Nielsen oqarpoq.
Angut taamatut sioorasaaruteqarsimasutut pasineqarpoq.
Aamma atuaruk VIDEO Nuummi GU-mut aallaasersornissamik sioorasaarisoqarnera pissutigalugu politiit qimagussortitsisut
Angut kinaanersoq paasinarsimmat, taassuma i napparsimmavimmi allagartai Morten Nielsenip aamma saqqummiuppai.
Angullu tarnikkut ajornartorsiuteqartoq, allagartaasa paasinarsisippaat, ilaatigut tarnikkut nappaateqartoq ersermat.
Eqqartuussisup Johanne Banke Thorup unnerluussisup kissaataa, tassa angutip pasisap ulluni 25-ni marsip pingajuata tungaanut tigummigallarneqarnissaa, akueraa. Angut pasisaq peqqinnerulissappat politiit akunnernik 24-nik periarfissaqassapput angutip inatsisit tunngaviusut naapertorlugit killisiornissaanut.
Illersuisoq Ulrik Blidorf unnerluussisup kissaataanut akerliunngilaq.
