Pasineqartoq inimini aallaaseqarpoq
Politiit akunnerit 24-it sinnerlugit matuma siorna, ippassarli GU-mi eqqaanilu meeqqerivimmiit qimarngussuisoqareersoq, kingornalu Kongevejip eqqaani Qimerluanilu aqqusinernik killilersuisoqareersoq, angut pasineqartoq ualeq tallimanut qeqqaliivissoq tigusarineqaraat. Politiit tusagassiutinut tamanna nalunaarutigaat.
- Politiit Kongevej 11-p taassumalu eqqaani tigusarinninniarnertik naammassivaat.
Læs også ASSIT Nuummi Kongevej 11 suli assersugaavoq
Angut pasisaq Kongevejimi angerlarsimaffimmini tigusaavoq, politiinillu tigummineqalerluni, politiit allapput.
Politiit nalunaarutigaat, pasineqartup angerlarsimaffiani misissueqqissaarnerani, aallaasit nanineqarsimasut. Tamannalu peqqutigalugu Nuup qeqqani angutip angerlarsimaffiatalu eqqaani annertuumik killilersuisoqarsimasoq, qimarngussuisoqarlunilu.
- Misissueqqissaarnerit aamma takutippaat aallaaseqarsimasoq aammalu ikuallajasunik inimiittitaqarsimasoq. Taamaammat piareersimaffigisassat tamarmik atuutsinneqarsimapput. Politiit ullup ingerlanerani angutip angerlarsimaffiata eqqaa iserfigeqqusaajunnaarlugu killilersorneqarsimavoq. Tamaanilu najugaqartut qimagussuuttinneqarsimapput angutip nammineerluni tunniutiinnarnissaa neriuutigineqarsimagaluarluni, politiit tusagassiuutinut nalunaarumminni allapput.
Læs også Nuummi Qeqqata ilinniarnertuunngorniarfiani siooraneq qaangiuppoq
Tigusarineqartoq angut 28-nik ukiulik, Nuummi Kongevej 11-mi najugaqartoq GU-mi ilinniartuusimagaluarpoq.
- Politiit angut GU-mut mailinik nassitsisimanissaa pasivaat. Tassani siorasaarutinik paatsoorneqarsinnaanngitsunik, ilaatigut USA-mi atuarfinni aallaasersortarnernik innersuunneqarsinnaasunik allagaqartarsimavoq, politiit tusagassiuutinut nalunaarumminni allapput.
Politiit misissueqqissaarnertik ingerlateqqippaat, kingornalu inatsisit tunngaviusut naapertorlugit eqqartuussivimmi killisiorneqassanersoq naliliiffigineqassalluni.
