Pride 2025: Akiuunneq suli naleqquttoq

Pridemi ingerlaaqatigiit Killut suli qimanngikkaat nalliuttorsiorneq aallareersimavoq. Qilaatersornermiimmi heavymetalimut gummi-eight-packimillu erinarsortartut assigiinngitsut arlallit tusarnaartitsipput.

Inuusuttunit utoqqarnut, queerinit straightinut nerrivinni issiavittalinnut katersuullutik, allagartanik assigiinngitsunik qalipaaterpassualinnik titartaapput, qiortaapput nipititerillutillu oqariartaatsinik isumassarsiarisinnaasaminnillu allattuillutik.

Ikinngutigiit marluk qungujulallutik alalgartamik sungaartumik tungujortumillu saaminiittuuteqarput. Tassani allassimavoq:

"Don't be a dick – suck one" aamma – piumasaq apeqqutaalluni – : "Don't be a pussy – eat one".

Assi © : Johansinnguaq Olsen/KNR

Takkuttut aallaqqaammut tamatugut tamaanaannaq pimoorussillutik peqataajartoraluarlutik nalunaaqutaq sisamanngormat – paradellu ingerlaaqatigiittussanngormata inuppassuit katersuullutik nuannannerilerpaat.

Qillaq Olsen Sipineq+-imi siulittaasoq inuppassuit megadonilerluni oqaasinnaaqarlunilu illoqarfimmi illut akornatigut akisuasumik suaartaateqarluni siuttuuffigai:

“Asannineq ajugaali, Asannineq ajugaali, Asannineq ajugaali – let love win!”

Peqataasut hunnorulinnik arlalinnik amerlassuseqartut ullormi qaserujukkajuartumi allagartanik atisanillu qalipaatigissaartunik atugaqartut aqquserngit nuannaarnermik soorunamilu neriusaanik erfalasunik ulikkaarpaat.

<em>Killut saanni nuannattoqarlunilu qalipaatigissaarpoq – allagartaliornermit finlandimiut dragip takutitsineranut. Soorunami aamma assilisinnissamut periarfissaqarput.</em> Assi © : Rasmus Balle Hansen/KNR

Akiuunnissaq suli pingaaruteqartoq

Naaja H. Nathanielsen inuussutissanut, aatsitassanut, nukissiuutinut, inatsiseqarnermut naligiissitaanermullu naalakkersuisoq qalipaatigissaarlutik peqataasut ilagaat. Taanna alloriarnerit maannamut anguneqareersimasut nalliuttorsiutigiartorlugit alloriarnissallu suli amigaataasut tapersersoriartorlugit parademut peqataavoq:

- Inuiaqatigiinni ullumikkut akuersaartoqarneruvoq, kisianni aamma ajoraluartumik muminganik aamma takussutissaqartoq takusinnaavara. Ilisimanngisanut ersineq. Nunarsuarmi sumiiffinni amerlasuuni pisinnaatitaaffiit atulersinneqarsimagaluartut tunuartinneqarsimapput, taamaammat akiuunnissaq ukiut 15-it matuma siornatulli suli naleqqutsigaaq, taanna oqarpoq.

<em>Naaja H. Nathanielsen Inatsiartut saannut takkuttunut hunnorulinnut arlalinnut oqalugiarpoq.</em> Assi © : Rasmus Balle Hansen/KNR

Naallu Naaja H. Nathanielsenip oqarnera naapertorlugu assigiinngisitsinermut aamma inunnut LGBTQ+-inut akerliunermut atatillugu suli suliassaqangaatsiaraluartoq suliaq ingerlallualereerpoq.

- Naligiissitaaneq assigiinngisitsinngissarlu pillugit inatsit siulleq inunnut LGBTQ+-inut tunngasumik ilaqartoq siorna akuerineqarpoq. Taamaammat pisinnaatitaaffinnik siorna atuutinngitsunik nutaanik ullumikkut peqarput oqaluttuarisaanermi ilaavoq.

100-inut hunnorulinnut

Ingerlaaqatigiinnermi Inatsisartut saanni majuartarfiit uniffissami kingulliupput, tassanilu erfalasoq neriusaaq siullermeertumik amuneqarpoq. Erfalasoq neriusaaq – qilaap putsut qasertut tunuanni qilaap tungujortup nuiartulernerani Erfalasutta saniani erfalavoq.

Sipineq+-imi siulittaasoq, Qillaq Olsen aappaluartumik annoraaqartoq ingerlaaqatigiinnermi attortisimavoq. Taassuma takkuttorpassuit tupaallaatigalugillu nuannaarutigilluinnarpai.

- Inuit ilimagisatsinninngaanniit amerlanerupput tamatuma aamma takutippaa qanoq tapersersorneqartiginerluta, taanna oqarpoq.

Sipineq+ LGBTQIA+-imi peqatigiiffiuvoq, tassannga inuit pisinnaatitaaffiisa illersorneqarnissaat paasissutissiissutigineqarnissaallu sulissutigineqartarput, kiisalu Nuumi Pride Paradeqarnissaanik pilersaarusiortuulluni.

<em>Qillaq Olsen, Sipineq+-imi siulittaasup ingerlaaqatigiinneq aallartippaa, ima suaartaateqarluni: "Asanninneq ajugaali, Asanninneq ajugaali, let love win!”</em> Assi © : Rasmus Balle Hansen/KNR

Tapersersuinerlu paasinngitsoorneqarsinnaanngilaq, meeqqat assaannit neriusaap erfalasuinit mikisunit illoqarfimmi soqutigisasaqatigiinnit Pride Paraden 2025-p piviusunngornissaanut tapiissuteqarunut.

- Tassa akueriartorneqarneruvoq malugisanni aamma taamatut takussaajartulernera iluaqutaavoq. Tapersersorneqarneq taamatut annertusiartuinnartoq, soorunalimi allanik suliassaqarpugut inatsisitigut, Qillaq Olsen oqarpoq.

Naalli parade naammassereeraluartoq nalliuttorsiorneq suli naammassinngilaq.

- Nuuk Pride suli iluamik naammassivinngilaq, unnugu aamma pisoqarumaarpoq, ulluni tulliuttuni Sipineq+-i aqqissuusseqqissaaq, malinnaalluarisi, taanna oqarpoq.

Pride Parade 2025 naammassivoq. Naliuttorsiorfiup inoqarunnaalersup nalliuttorsiortoqarsimaneranut takussutissaapput, Soundboksimiillu tusarnaakkat Cindy Lauperip atugaa Girls Just Want to Have Fun tusaaneqarsinnaavoq:
 

"I come home in the mornin' light
My mother says, 'When you gonna live your life right?'"
...
"And girls, they wanna have fun
Oh, girls just wanna have fun"

<em>Sipineq+ Inatsisartut saanni katersuuppoq, erfalasorlu neriusaaq Erfalasutta saani siullerpaamik erfalavoq.</em> Assi © : Rasmus Balle Hansen/KNR