Politimesteri: Nunaqarfinni inatsisitigut isumannaatsumik inissisimasoqarpoq

Politiit kisitsisaataat naapertorlugit nunaqarfiit sisamaagaangata ataatsip - imaluunniit nunaqarfinnit 52-init aqqaneq-marluk - kommunefogedeqannginnerat innuttaasut inatsisitigut isumannaatsuunissaannik innarliinngilaq. Nunatsinni politimesteri Bjørn Bay KNR-imut taama oqarpoq.

- Nunaqarfiit ilaasa politiinit sullinneqannginnerat isumannartutut isiginngilara, nunaqarfiimmi tamarluinnarmik politeeqarfiup aalajangersimasup atapput, tassungalu pissutsit nalunaarutigineqarsinnaapput taakkulu politeeqarfimmit nalilersuiffigineqartarput: Illoqarfimmit maannakkorpiaq ornigunnissatsinnut pissutissaqarpa?

Bayip erseqqissarpaa kommunefogeditut atorfiit tamaasa inuttaqartinnissaat kissaatigigaluarlugu. Aamma nassuerutigaa nunaqarfimmit nalunaarutiginnittoqarnerani illoqarfinni politeeqarfeqartunitulli suulluunniit pillugit ornigutsitsisoqartanngitsoq.

- Nunaqarfinnut kommunefogedeqanngitsunut kommunefogedeqartunut naleqqiullugu qanoq pisoqartillugu ornigunnissatsinnut allaanerusumik nalilersuisariaqartarpugut, Bjørn Bay taama oqarpoq.

- Taamaattoqarnerani inatsisitigut isumannaatsumik inissisimasoqarpa?

- Aap, taama isumaqarpunga, tamannami illoqarfimmit isumagisaraarput.

AAMMA ATUARUK Kommunefogedinut kiisami pikkorissaasoqalerpoq

Politiit siulittaasuat isumaqataavoq

Politimesteri politiit peqatigiiffiata siulittaasuanit Finn Jeppesenimit ilalerneqarpoq. Taassumali aamma nunaqarfiit tamavimmik kommunefogedeqarnissaat kissaatiginerugaluarpaa.

- Kommunefogeditut atorfinnit 52-iusunit aqqaneq-marluk inuttaqanngillat. Tamannalu ajoriinnagassaanngitsuusoq isumaqarpunga, Finn Jeppesen oqarpoq.

Pingaartumik Folketingimi nunatsinnit ilaasortaatitaasut danskit inatsisinik atortitsinermut ministeriat nunaqarfinni inatsisitigut pissutsit qulakkeeqqullugit kimigiiserfigalugu ukiorpassuarni ilungersuutigisimavaat. Tamatumalu qulakkeerneqarnissaa danskit naalakkersuisuisa Venstremit siuttuuffigineqartut isumagineqassasoq aamma oqaatigisimavaat.

Kommunefogedilli akissarsiaat malunnaatilimmik qaffanneqarsimagaluartut sulisussarsiortoqartaraluartorlu atorfiit tamakkerlugit inuttalerneqarsinnaasimanngillat.

Politiillu atorfiit inuttalerneqarnissaat kissaatigigaluaraat atorfik ilungersunarsinnaasoq Finn Jeppesenip nassuerutigaa.

- Pinngitsaaliilluta kommunefogedinngortitsisinnaanngilagut (...). Nammineerlunga paasisinnaavara nunaqarfimmi 100-nik innuttaqartumi "sheriffiussagaanni" immaqa toqqissisimanarpallaassanngitsoq. Tamatumunngali tunngatillugu soorunami uagut sapinngisatsinnik ikiuillutalu ilitsersuissaagut.

Aamma atuaruk Politiit pillugit isumaqatigiissut Aleqa Hammondip isornartippaa

Aamma atuaruk Kommunefogedit amerlineqarnissaat Danmarkimit tapersersorneqarpoq