Kommunefogedinut kiisami pikkorissaasoqalerpoq
Kommunefogedit ilinniartinneqarnissaat pisariaqartoq taakkua siulittaasuata, Isak Kristiansenip, aggustimi oqaatigaa. Oqariartuutinilu sapaatip akunnerani uani uteqqillugu:
- Ilisimasariaqarpaat kommunefogeditut atorfinitsitaassagunik suut suliaasinnaasut suulluunniit arlaatugaatigut iliuuseqarfigalugit paasereersimasariaqarpaat.
- Eqqaamanerlunngikkukku politiit ukiut sisamat ilinniartinneqartarput. Kommunefogedillu nunaqarfinni politiitut sulisarput, kommunefogedinngortoqassappallu aaliangersimasumik ilinniartinneqartarnissaat pisariaqartupilussuuvoq, Isak Kristensen oqarpoq.
Kissaatigineqartullu ilaat piviusunngortussanngorput. Kommunefogedit pikkorissartinneqarnissaannut ilinniaqqinnissaannullu Kalaallit Nunaanni politiit 2016-imut aningaasaliisut, Nunatsinni politiit qullersaat, Bjørn Tegner Bay-ip nalunaarutigaa.
- Kommunefogedit ukiut kingullit marluk-pingasut pikkorissarnissaannik periarfissinneqarsimannginnertik pillugu oqariartuutaat isumaqatigaakka. Maannalu pikkorissartitsinissarput pilersaarusiuleruttorparput, Bjørn Tegner Bay oqarpoq.
Aamma atuaruk Politiit pillugit isumaqatigiissut Aleqa Hammondip isornartippaa
Politiit piginnaasaannik pingaarnernik kommunefoginngorlaat misilittagaqartullu pikkorissartinneqassapput.
- Kommunefogedit suliassaminnut akisussaaffimminnullu sakkussaminnik pikkorissartinneqassapput. Soorlu pisariaqarluinnartillugu imminut illersorsinnaanermut, politiit sulinerminni tunngaviusumik malitassaannik, tassani assersuutigalugu pinerlunnerup politiillu iliuusissaasa imminnut naapertuunnissaannut, eqqartuussisarnermut inatsit, pinerluttulerinermilu inatsimmut pikkorissaasoqassalluni.
Kommunefogedit pikkorissartinneqartarnissaat ilaatigut aamma politikerinit qangalili kissaatigineqartaraluartut, sooq maanna aatsaat aallunniarneqalernera politimesterip nassuiaatissaqartinngilaa.
Aamma atuaruk Kommunefogedit amerlineqarnissaat Danmarkimit tapersersorneqarpoq
- Siornatigut pikkorissartitsisareerpugut. Ajukkuusaarutigali aana, piffissaq sivisuumik pikkorissartitsisimannginnatta. Kingullermik 2011-miunngikkuni 2012-mi pikkorissartitsivugut. Sivisuallaamillu pikkorissaasimanngitsnitsinnik oqalunneq isumaqatigivara Taamaammat maanna ujartuisoqarnera paasisinnaavara, Bjørn Tegner Bay oqarpoq.
Pikkorissartitsinissamut aningaasartuutit Kalaallit Nunaanni politiit missingersuutiminnit matussusissavaat. Politiinulli isumaqatigiissummut folketingimi amerlanerussuteqartunit novembarimi akuersissutigineqartumut attuumassuteqanngitsoq, politimesterip ilisimatitsissutigaa.
Pikkorissartitsinerit sapaatip akunnerinik ataatsimik marlunnilluunniit sivisussuseqartassapput.
