Politikkimi siuariartupilooriarluni: Jens-Frederik Nielsen naalakkersuisuni siulittaasuusartuni inuusunnersaasoq

Sulorarluni arlaleriarluni kuultinnattarnini ilisimaneqaatigaa. Jens-Frederik Nielseniliuna kinaasoq? Nunatsinni naalakkersuisut siulittaasoriligaannik ilisimannilluartut pingasut KNR-ip oqaloqatigai.

Allattoq Ann-Sophie Greve Møller

marsip 31-at 2025 07:30

Nutserisoq Nathan Kreutzmann, Karla Heilmann

Politikkimi siuariapiloorpoq. Jens-Frederik Nielsen ukiut aqqanillit matuma siorna politikkimi takussaanngivippoq. Taanna tallimanngormat naalakkersuisuni siulittaasunngorpoq, 33-nnarnillu ukioqarami nunatta oqaluttuarisaanerani naalakkersuisuni siulittaasuusartuni inuusunnersanngorpoq.

Parteeqataa Nivi Olsen 2014-imi naalakkersuisuunngorami, Jens-Frederik Nielsen politikkimi taamani misilittagaqanngitsoq allatsimisut atorfinitsippaa.

Nivi Olsenip oqarnera naapertorlugu partii taamani ikittuinnarnik nukittuunik ilaasortaqartoq, ”siunissaqanngitsutut” isigisaavoq:

- Angut aatsaat takusara uattulli liberaliusumik suliniuteqarluni sorsuuteqartoq inoqatinut attaveqaqatigiittarfikkut takuara. Saninni sukataaqatigilerpaanga, uffalu naapinnikuunngisaannarinni. Tunngavilersuillaqqeqaaq, taamaammat eqqarsarpunga ´kinaana taanna Jens-Frederik Nielsen´.

Jens-Frederik Nielsen

Jens-Frederik Nielsen 1991-imi inunngorpoq ullumikkullu 33-nik ukioqarluni.
Nuummi inuuvoq peroriartorlunilu, qatanngutigiinni sisamaasuni nukarliuvoq.
Aappani meeqqatillu pingasut Nuummi najugaqarput.
Ilisimatusarfimmi Inuiaqatigiilerinermi ilinniarnikuuvoq. Ilinniakkanili naammassinngilaa, Demokraatiniit Nivi Olsenip naalakkersuisunngornerani allatsitut 2014-mi atorfinitsinneqarnini pissutigalugu.
Naalakkersuisup allattaatut 2014-imiit 2016-imut atorfeqarpoq. Tamatuma kingorna Demokraatini allaffissornikkut suliassanik suliaqalerpoq.
2020-miit 2021-mut inuussutissarsiornermut aatsitassanullu naalakkersuisuuvoq.
Demokraatini 2020-mi siulittaasunngorpoq.
2021-mi Inatsisartunut qinersisoqarmat Demokraatini ilaasortat affaannanngorput, Inatsisartunilu pingasuinnarnik ilaasortaatitaqalerlutik.
2025-mi taaguunneqarnerpaavoq, taasisut 30 procentiinit Demokraatit pingasoriaataat sinnerlugit amerleriarput. Inatsisartunut qulinik ilaasortaatitaqalerlutik. Qinersinermi Jens-Frederik Nielsen 4.850-inik taaguunneqarluni ajugaavoq.
Jens-Frederik Nielsen 2025-mi oqaluttuarisaanermi aatsaat taama siammasissumik naalakkersuisoqatigiinnik pilersitsivoq, tassani Demokraatit, Inuit Ataqatigiit, Siumut Atassullu naalakkersuisoqatigiilermata. Naleraq kisiartaalluni illuatungiliuttunngussaaq. Jens-Frederik Nielsen naalakkersuisut siulittaasorilerpaat.

Allisiguk

Taamani qinersisoqareersorlu Siumut, Atassut aamma Demokraatit naalakkersuisoqatigiilermata, Nivi Olsen kultureqarnermut, ilinniartitaanermut ilageeqarnermullu naalakkersuisunngorami nalorninngilaq. Jens-Frederik Nielsen allatsigilerusuppaa.

- Eqqarsarpunga, kina alla taama inuusutsigisoq politikkimik taama paasisimasaqartigissagami? Utoqqasaaq silatuutut eqqarsartarpoq. Atorflittat inuusuppallaaralugu mianersoqquaannga, Nivi Olsen oqarpoq.

Taannali aalajangereersimavoq. Jens-Frederik Nielsen taamani 22-nik ukioqarluni Ilisimatusarfimmi inuiaqatigiilerinermik ilinniakkani taamaatillugu Namminersorlutik Oqartussat illorsuanni sulilerpoq.

- Naalakkersuisut allattaattut pitsaanersaavoq. Ukioq ataaseq qaangiutiinnartoq kikkut tamarmik (naalakkersuisut, aaqq.) allatsigerusulerpaat. Tatiginartuuvoq. Oqartarpoq, ´aallaaneqarnialeraluaruit saannut pissaanga´, Nivi Olsen oqarpoq.

Partiimi ataataq

Demokraatit ukiut marluk qaangiunneranni naalakkersuisoqatigiinniikkunnaarput, Jens-Frederik Nielsenili partiimi ingerlarsuinnarpoq.

Taannami Demokraatit 2020-mi naalakkersuisunut ilannguteqqimmata inuussutissarsiornermut aatsitassanullu naalakkersuisunngorpoq. Ukiorlu taanna aamma partiimi siulittaasunngorluni.

Demokraatit aappaaguani naalakkersuisuni peqataajunnaarput. Qineqqusaartussanngorporlu – tamatumuuna partiip siuttuatut. Neriuutigisaatulli ingerlanngilaq. Demokraatit inatsisartuni ilaasortaatitaat affaannanngorlutik pingasuinnanngorput.

- Partiip ilaasortaatitai affaannanngormata aliasoqaagut, inutsialaallu suleqatigut annaavagut. Jens-Frederiup akisussaaffik tamaat tiguaa. Oqarfigaanga: ´Partiimi ilaasortaatitagut marloriaatinngortinnagit uninnavianngilanga´. Taava sulilluta aallartippugut, Nivi Olsen oqarpoq.

Inatsisartunulli qinersinermi qaangiuteqaammersumi partiimit ilaasortaatitat ilimagisamit amerlanerunerat Jens-Frederik Nielsenip nuannarutissaraa. Demokraatimmi ilaasortaatitaat pingasoriaammik amerlipput, nunatsinnilu partiini annersaasutut imminnut taasinnaanngorput.

Taannalu oqaluttuarisaanermi aatsaat taama siammasitsigisumik naalakkersuisoqatigiilioqqammerpoq, tassami Demokraatit, Inuit Ataqatigiit, Siumut aamma Atassut nunatsinni naalakkersuisunngormata.

Partiip ajugaarujussuarnera Jens-Frederik Nielsenip qiimasuuneranik ilaatigut pissuteqartoq, Nivi Olsen ilinniartitaanermut, kultureqarnermut, timersornermut ilageeqanermullu tallimanngormat naalakkersuisunngortoq oqarpoq.

- Takkuppallannera tusaaneqarsinnaajuaannarpoq. ´Kumoorn´, ´kumoorn´, ´kumoorn´, taama oqartarpoq. Uivertoqartillugu aamma pisarpoq, ´ataatap aaqqissaqqaarpai´. Partiimi inuusunnersat ilaanniippoq, imminulli ataatatut taasarluni, taanna illarluni oqarpoq.

Tunniutiinnajuitsuunerarpaalu.

- Kingulliulluni oqaaseqarusuttarpoq. Oqallinnerni imaluunniit spillimi ajorsarsimaguni ingerlaannaq unammeqqikkusuttarpoq, ajugaanissilu tikillugu unammisarluni.

Ajorsarneq aporfigineq ajoraa

Jens-Frederik Nielsen sulorarluni unammigaangami aamma tunniutiinnajuitsuuvoq. Sulorarluni nunatsinni ajugaaniunnerni arlaleriarluni pissartanngortarpoq, nunanullu allanut unammisartunut ilaasarsimalluni.

Unammilluartagaasa ilagaat Frederik Elsner, taassuma aamma nipilersoqatigiit, Nanook, peqataaffigai.

- Jens-Frederik anguniagaqartarpoq, upperalugillu anguniartarlugit. Piviusunngortittarpaalu. Siunniussanilu anguniartillugit nutaanik periusissaqartuaannarnini alutornaqutigaa, Frederik Elsner oqarpoq.

Jens-Frederik Nielsen silatusaallaqqissuuvortaaq. Taamaanninilu skakkeraangami iluaqutigilluartaraa, Frederik Elsner oqarpoq.

Unammiinnartanngillalli – taakkumi sulorartartut marluk aamma ikinngutigiilluarput.

- Jens-Frederik suliaminut pimoorussilluinnartuusarpoq. Ilisimasaqarfigivallaanngisani nalornissutiniluunniit misissupallakkaangamigit paasisaqarfigipallattarpai. Tunniusimalluinnartuuvoq, Frederik Elsner oqarpoq.

Jens-Frederik Nielsenip sulorartarnera politikkimi sulineranut pingaaruteqartoq, nipilersortartoq oqarpoq.

- Iluatsinngitsoortoqaraangat imminut pakatsisittorujussuusarpoq. Akerlianilli aamma taanna nukittoqutigaa. Ajorsarnini aporfigineq ajorpaa, nukittunerussutigiliinnartarpaali, Frederik Elsner oqarpoq.

Timersorneq pinngortitaq guitarilu

Timersorneq Jens-Frederik Nielsenip soqutigisarilluinnaraa arnaataata Anika Brandt Sørensenip uppernarsarsinnaavaa.

- Timersuutit suugaluartulluunniit nuannarilluartuuai, timersortartut aqqi arsartartuniit sisorarlutik ooqattaasartartunut tamaasa nalunngilai, taanna oqarpoq.

Jens-Frederik Nielsen aamma Anika Brandt Sørensen ukiuni aqqanilinngulersuni aappariipput, marluullutillu nuummiuupput. Illoqarfiit pingaarnersaanni meeqqatillu pingasut najugaqarput.

Jens-Frederik Nielsenilli inuunerani politikki timersornerlu initugaluaqisut, ilaquttaminik pingaartitsisuusoq apeqquserneqarsinnaanngitsoq, Anika Brandt Sørensen oqarpoq.

Ilaqutariit pinngortitamiingaatsiartarput.

- Pinialuttarpoq, umiatsiamik angalaarneq pinngortitamiinnerlu nuannarilluartuuai. Angajoqqaavut tamarmik illuaraqarput, uagullu kangerluup iluani piniariartarfeqarluta, taanna oqarpoq.

Jens-Frederik Nielsen inunnit amerlanernit politikkimi pisunit ilisimaneqarnerugaluartoq, soqutigisai politikkiinnaanngillat. Soorlu nerisassiorneq aamma guitarerneq soqutigisarigai, Anika Brandt Sørensen oqarpoq.

Jens-Frederik Nielsen nipilersortartunik kalaallinik qanganisalaanik nuannarisaqartuuvoq. Partiit nuannatileraangata guitariminik appittartoq, Nivi Olsen oqarpoq.

Nuannaartuunera tassuuna saqqummertarpoq, taamaattuuneralu naalakkersuisuni siulittaasuunermini sakkussaasa pingaarnerpaartarissagaat, partiimi ilaasortaaqataa isumaqarpoq. Tassami Amerikap præsidentiata Donald Trumpip nunarput aqulerusullugu kissaateqarnerani, politikkikkut pissanganartorsiornermi Jens-Frederik Nielsen naalakkersuisuni siulittaasunngorpoq.

- Unammillernartut annerpaartai akiussagai nalunngilara. Aqutsisuunermini nuannaartuunera sakkussaani pingaarnerpaavoq. Uivernermiikkaluartugulluunniit suna tamarmi iluarsissaqqaartoq oqartuaannarpoq. Akisussaaffimmik tigusisarpoq sullarilluinnartuullunilu, Nivi Olsen oqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.