VIDEO Politikkikkut alaatsinaattup Siumup nipangersimaannarnera tupigusuutigaa
Politikkikkut alaatsinaattoq Flemming Enequist taama isumaqarpoq, ilanngullugulu oqaatigaa tamanna partiip qinigassanngortitaanut ilisarimaneqannginnerusumut ilaqutaaginnaratarsinnaassasoq.
- Nipangersimaannarneq tupigusuutigineqarpoq, tamannalu pitsaanngitsumik kinguneqarsinnaavoq. Pissanganassaaq qanoq pisoqarumaarnersoq.
Aamma atuaruk Aleqa Hammondip qinigassanngortinnera Siumumi avissaartuussutavoq
- Siumup tapersersortaata akornanni nalorninermik pilersitsisinnaavoq, inuusuttullu qinerserngaartussat partiip sumiinnera takujuminaatsilersinnaavaat tusagassiutitigut saqqummertoqarumanngiinnarpat. ”Partii saqqummerumanngitsoq qanoq ilillunga qinersinnaagakku”. Inuusuttut qinersisartut akornanni eqqarsaatit taamaattut pilersinnaapput, Flemming Enequist KNR-imut taama oqarpoq.
Erik Jensenimut periarfissagissaartitsisinnaasoq
Aleqa Hammondip partiimi qinigaanissaanut akornutaasinnaanersoq apeqqutaassaaq, siulittaasup Kim Kielsenip saaffiginnissuterpassuit qisuariarfiginngiinnarpagit.
- Taamaattoqaratarsinnaavoq. Kisianni aamma Siumukkormiut allamik qinigassaminnik immaqa ujarlileratarsinnaapput. Imaassinnaavoq qinersisartut Erik Jensen toqqaraat, pingaartumik tv-kkut saqqummernermini takutitsilluassappat partiilu pitsaasumik saqqummiullugu.
Aamma atuaruk Siumup siulittaasua nipangersimajuarsinnarpoq
- Qinersisartunut nutaanut tunngatillugu pissanganassaaq qanoq sassartissanersoq, aammalu qineqqusaarnerup ingerlanerani tv qanoq atorluartigissaneraa, Flemming Enequist taama oqarpoq.
Assersuutitullu eqqavaa Nivi Olsen Demokraatineersoq, ilisarisimaneqanngiivilluni tv-kkut malunnaatilimmik saqqummertarnermigut qinigaalluarluni naalakkersuisunngortoq.
