Politikerit nunatsinni sillimaniarneq pillugu aasareerpat oqimaaqatigiisitsiniarsarissasut
![](/sites/default/files/styles/image_934x467/public/article_images/280387836_1616365058744804_4475175124433960584_n_0.jpg?h=496dd2d4&itok=_az-o3jA)
Issittoq sakkulersuuffiussanngilaq. Nunarsuarmili allanngorsimasumi annerusumik sillimaniartariaqarpugut.
Nunatsinni, Savalimmiuni Danmarkimilu politikerit illersornissaq pillugu isumaqatigiissutissamut inaarutaasumik isumaqatigiinnialerunik soqutigisat marluk oqimaaqatigiissinniartariaqassavaat.
Nunanut allanut tunngasunut naalakkersuisoq, Vivian Motzfeldt (S), isumaqatigiissutissamut tunngavissanik isumaqatigiittoqareersorlu taama oqarpoq.
- Uagut politikkikkut pingaartinnerpaasarput tassaavoq, Issittoq sakkulersorfiussanngitsoq. Taamaammat suliniutit tamarmik tassani tunngaveqarput. Kisianni illuatungaa ilisimaqqissaarlugu, taama oqariartorneq aamma illuatungaanik piumasaqarmat, Vivian Motzfeldt oqarpoq.
Nunarsuarmi allanngoriartortumi sillimaniarneq
Rusland Ukrainemik saassussimmat nunarsuarmi pissutsit allanngortut taassuma erseqqissaatigaa. Pissutsillu allanngormata, nunanik allanik suleqateqarneruneq, sillimaniarnermillu ukkataqarneruneq pisariaqalerput.
- Ilisimallugu nunarsuarmi pissutsit imaaliallaannaq aqussinnaanngikkigut, tamannalu piumasaqartoq upalungaarsimanikkut illersornissakkullu atortulersuutinik inerisaasariaqarluta.
Nunat allat akersuunnerisa Issittumut siaruaatinngisaannarnissaat politikkikkut sulinermi qitiutikkitsik, Vivian Motzfeldtip oqaatigisaqattaarpaa.
- Suulluunniit nunat allat akerleriissutaat appakartinneqassanngippata, taava imartatsinni susoqarnersoq ilisimasariaqarparput. Taannalu atortulersuutinik ullumikkuminngaanniit annerusumik inerisaasariaqarnermik piumasaqarpoq, Vivian Motzfeldt oqarpoq.
Tassalu nunatta imartai nakkutigineqarnerulertussaarpasipput.
Illersornissaqarfiulli najuunnera aamma sakkutuujunngitsunut iluaqutaasariaqartoq, Vivian Motzfeldt isumaqarpoq. Taamaammat illersornissaqarfiup najuunnerunissaata assersuutigalugu annaassiniarnermut iluaqutaanissaa Naalakkersuisut qulakkeerniarpaat. Aamma soorlu immap naqqani kabelip nakkutigineqarnerunissaa nakkutilliinerunermi qulakkeerneqarsinnaasoq.
Taamaammat nunatta attaveqaatersuutaasa sakkutuunit sakkutuujunngitsuniillu atorneqarsinnaanissaat eqqarsaatigineqarnerulissaaq.
- Qallikkut pingaarnerpaatitat tassaallutik inerisaanerit inuiaqatigiinnut kalaallinut, suliffeqarfitsinnut ilisimatusarnikkullu ingerlatatsinnut tamanut iluaqutaallutillu suleqataaffigineqassasut.