Politikerit Amerikameersut Nuummut sapaatip-akunnerata naanerani tikeraalersut

Demokraatit republikanerillu Amerikap inatsisartuineersut Nuummut sapaatip-akunnerata matuma naanerani tikeraassapput. Amerikamiut sinniisoqarfiat taama ilisimatitsivoq.

Sinniisoqarfimmiit oqaatigineqartoq naapertorlugu, Naalakkersuisut qaaqqusisuupput. 

Taakkua Naalakkersuisuni ilaasortat, Inatsisartunut ilaasortat inuussutissarsiortullu tikeraarnerminni ataatsimeeqatigissavaat.

- Naalakkersuisut kalaallillu isiginnittaasiat pillugit paasisaqarnerunissarput siunertarineqarpoq aamma USA-mut attaveqarneq pillugu oqaloqatigiinnissarput, Amerikamiut konsuuleqarfiat allappoq. 

Konsuuleqarfiup paasissutissiinera naapertorlugu, Amerikamiut politikerii Amerikap naalakkersuisuisa timmisartuutaannut ilaallutik tikissapput.

Kikkuuneri suli paasineqanngitsoq

Allartitat Nuummut tikittussat kikkuuneri avammut suli saqqummiunneqanngilaq. 

Aaja Chemnitzip (IA) republikanerit senatoriat Alaskameersoq, Lisa Murkowski, sapaatip-akunnerani kingullermi tallimanngornermi tikittussaagaluartoq, KNR-imut sapaatip-akunneri marluk matuma siorna oqaatigaa.

Tikeraarnissaali tallimanngornermut matumunnga kinguartinneqarpoq. 

Amerikamiut politikerii aallartitat aqqaniliusut Danmarkimut qaammat kingulleq tikeraarput.

Taakkua Inatsisartut nunanut allanut sillimaniarnermullu ataatsimiititaliaat tikeraarnerminni ilaatigut ataatsimeeqatigaat.

Amerikamiut politikerii aallartitat, Nuummut sapaatip-akunnerata naanerani tikeraartut, nunanut allanut sillimaniarnermullu ataatsimiititaliaq sapaammi ataatsimeeqatigissavaat.

Tusarfik tutsuiginartoq KNR-imut taama ilisimatitsivoq.