Lisa Murkowski Nuummukalersoq
Tikeraarnissaq sapaatit akunneranik ataatsimik kinguartinneqartoq DR-ip allaaseraa. DR-ip allaaserisaq saqqummersinneqareersorlu Aaja Chemnitz oqaloqatigisimavaa. Lisa Murkowskip tikeraarnissaa silap ajornera teknikkikkullu ajornartorsiutit assigiinngitsut pissutigalugu februaarip ulluisa arfernata tungaanut kinguartinneqartoq Aaja Chemnitzip dr.dk-mut oqaatigaa.
Lisa Murkowski Nuummut tallimanngorpat tikissaaq.
Murkawskip Nuummut tikeraarnermini politikerinik sunniuteqarluartunik ataatsimeeqateqarnissaa pilersaarutaasoq, IA-mit Aaja Chemnitz oqarpoq.
- Lisa Murkowskip Nuummut tikeraarnissaa qangali kissaataavoq. Suut tamarmik suli pilersaarusiorneqaleruttorput, kisianni kalaallit inuiaqatigiit pillugit USA-mi ilisimasaqarnerusoqalernissaanik qulakkeeriniarnerullunilu periarfissanik oqaluuserinninnissamut periarfissiissaaq, Aaja Chemnitz oqarpoq.
Lisa Murkowski Kalaallit Nunaata, Danmarkip USA-llu akornanni pisut oqaluuseriartorlugit politikerinillu ataatsimeeqateqariartorluni senatorit allat peqatigalugit Københavnimut sapaatip akunnerata kingulliup siuliani tikeraartut ilagaat. Senatorip Angus King aamma senatoriusoq tikeqatigissagunarpaa.
- Kalaallit Nunaannik illersuisunik iligisaqarnissarput aamma nunatsinni inunnik toqqaannartumik oqaloqateqartoqarnissaa pingaaruteqarput, taamaammat tamanna (Nuummut tikeraarnissaanut aaqq.) tunngaviuvoq.
Ilisimasaqarnerunissaq pingaaruteqartoq
Nuummi ataatsimiinneq USA-p Kalaallit Nunaata Danmarkillu pissutsinut maanna inissisimaffigisaanut qanoq isumaqassava?
- Lisa Murkawskip ilisimariigaanut ilassutaassaaq, aamma nunatsinni nalinginnaasumik qanoq isumaqartoqarneranik siammasinnerusumik paasisimasaqartitsilersinnaassaaq. Suna pisariaqarpa aamma suut suleqatigiissutigineqarsinnaappat, IA-mit politikeri oqarpoq.
Aaja Chemnitzip nunatta, Danmarkillu USA-llu akornanni suliami sammiviit maanna marluusut, sammiviillu taakku ataqqineqarnissaat pingaaruteqartoq erseqqissaatigaa.
Sammivimmi siullermi suleqatigiissitaq Washingtonimi ataatsimiinnermi aalajangerneqarpoq aappaatut Natop tungaaniit aamma sammiveqartoqarluni.
- Kisianni ilisimasaqarnerulernissamut pingaartumik Amerikamiut tungaanniit pisariaqartinneqangaatsiarpoq.
Lisa Murkowskillu tikeraarnera uani atorneqassaaq. Aaja Chemnitz nammineq aamma Nuummukassanersoq suli nalunartoq, taassuma KNR-imut oqaatigaa.
