Politikeri nakuusersimasutut eqqartuussaasoq

Politikeri angut pinerloqqissagaluaruni pineqaatissinneqarsimasunut inissiisarfimmiittussanngorluni Tasiilami nakuusersimasutut Eqqartuussisoqarfik Sermersuumi sapaatit akunnerata siuliani eqqartuussaavoq.

Angut taanna ukiumi aggersumi pinerloqqissagaluaruni pineqaatissinneqarsimasunut ulluni 14-ini inissiisarfimmiittussanngorluni eqqartuussaavoq.

Tassa ukiumi aggersumi pinerloqqissagaluaruni pineqaatissineqarsimasunut inissiisarfimmiittussanngortussaassaaq – ulluni 14-ini sivisunermilluunniit, pinerlussimasutut eqqartuussaaqqissimanersoq apeqqutaasussaassalluni.

Unnerluussisussaatitaasuunerup Lars Petersenip suliami tassani eqqartuussut naammagisimaarpaa:

- Unnerluussisussaatitaasut eqqartuussut naammagisimaarpaat, unnerluutigineqartup qanoq ajoqusiitigisimanera suliallu taassuma 2021-meersuunera eqqarsaatigalugit.

Unnerluutigineqartup eqqartuussut aamma naammagisimaarneraa ilisimaneqanngilaq, eqqartuussulli akerliliinertaqanngitsumik akueraa. Unnerluutigineqartoq eqqartuussaanerminik suliareqqitassanngortitsiniarnerluni aalajangernissaminut ullunik 14-inik eqqarsarfissaqarpoq.

Riivit nuuat napisoq

Suliaq unnerluutigineqartup 2021-mi ukiassariartulernerani aggustimi unnuit ilaanni riivilersorneranut tunngassuteqarpoq.

Unnerluutigineqartup nakuuserfigisani kimillallugu tilluusartillugulu riivinik anaasimagaa, unnerluussummi allaqqavoq. Pisoq unnerluussummi ima nassuiarneqarpoq: 

- Unnerluutigineqartup nakuuserfigisani mikileraatigut siffiaatigullu anaagamiuk riivit nuuat napivoq nakuuserfigineqartup naakkut eqqortinneranik kinguneqartumik. 

Pisorli tassunga naanngilaq. Unnerluutigineqartummi nakuuserfigisani riivit ipuannik anaaqqippaa.

- Unnerluutigineqartup nakuuserfigisani riivit ipuannik kingunitsiannguagut anaavaa uppataatigut eqqorlugu.

Unnerluussummi taama allaqqavoq.

Eqqartuussaanermik suliareqqitassanngortitsiniarnerluni aalajangernissamut eqqarsarfissaq naappat, suliaq inaassaaq.