Danmarkimit tikeraartoqarnissaq naalakkersuisoqatigiinni isumaqatigiinnginnermik siullermik aallartitsisoq

Danskit ministeriunerat, Mette Frederiksen Nuummut pingasunngornermit tallimanngornermut tikeraassaaq. Taassuma naalakkersuisunngortussat tassani naapinniarpai.

Taassuma naalakkersuisunut siulittaasunngortussap piaartumik tikeraarnissaa pingaartillugu siusinnerusukkut oqaatigaa.

Naalakkersuisulli Inatsisartunit suli akuerineqanngitsut naalakkersuisoqatigiit iluanni avissaartuunneq siulleq takussutissaqalereerpoq.

Vivian Motzfeldtimmi (S) ministeriunerup tikeraarnissaa naammagisimaanngilluinnarpaa.

Ataqatigiissumik pissusilersuuteqartoqanngitsoq

Vivian Motzfeldtip tusagassiuutinut nalunaaruteqarnermini Danmarkimit tikeraartoqarnissaata akuerineqarnissaa nammineq isumassaqartinnagu nassuiaatigaa. Taassuma naalakkersuisoqatigiit naalakkersuisunik nutaanik pilersitsisoqannginnerani amerikamiut politikeriinit tikeraarnissaa isornartorsiorsimagaat erseqqissaatigaa.

Taamaammat tamanna danskit ministeriuneranut aamma atuuttariaqartoq Siumup siulittaasua isumaqarpoq.

- Pissusissamisuunngilaq suli Naalakkersuisut pilersinneqarsimanngitsut ministeriuneq Mette Frederiksen Naalakkersuisunik naapitsiartorluni nunatsinnut angalassappat – pingaartumik nammineq taannaqqissaaq isornartorsiorsimaguniuk, oqariartorluni USA-p naalakkersuisui nunatsinni Naalakkersuisut nutaat pilersinneqarsimatinnagit ornigutissaguni pissusissamisuunngitsoq, Vivian Motzfeldt allappoq nangillunilu:

- Ataqatigiissumik avammut pissusilersussagutta, inerniliussassaq unaasariaqarpoq, ministeriunerup tikeraarnissaa aatsaat pisinnaasoq Inatsisartut katersuussimalerpata aamma Naalakkersuisut nutaat ivertinneqarsimalerpata.

Atassutip siulittaasuata, Aqqalu C. Jerimiassenip Vivian Motzfeldtip isornartorsiuinera taperserpaa. Taanna tusagassiorfimmut Politikenimut oqaaseqaammi ima akissuteqarpoq:

- Mette Frederiksenip maannakkut tikeraarniarnerluta nammineq aalajngigassaraa, kisianni kalaallit naalakkersuisuisa inissinnissaat Inatsisartuniillu akuerineqarnissaat utaqqeqqaaraluarunigit tamanna pitsaanerussagaluartoq isumaqarpunga.

Siulittaasunngortussaq qilanaartoq

Naalakkersuisunut siulittaasunngortussaq, Jens-Frederik Nielsen (D) allaanerusumik oqaaseqarpoq. Taassuma tikeraartoqarnissaa qanoq qilanaaritiginerlugu KNR-imut mailikkut nassuiaatigaa.

- Ministeriunerup tikeraarnissaa kissaatiginikuuarput aammalu assut uanga nammineq qilanaaraara. Qallunaat Nunaat suleqatitsinni qaninnerpaatut suleqatigigatsigu naliginnaasuuvoq sukkanerpaamik naapinnissarput. Ministeriunermut kissaatigalugu apuuppara pilersaarutigut attatiinnassagigut. Naalakkersuisut siulittaasussaattut qilanaarpunga oqaloqatigiilluarnissatsinnut siunissami suleqatigiinnissaq eqqarsaatigalugu.

Taamaalilluni Vivian Motzfeldtip oqaaserisai nammineq isumaanut taamaallaat tunngassuteqarnerarpai, tamannalu naalakkersuisunngortussat isummernerinngikkaat erseqqissaatigalugu.

- Erseqqissaatigissavara tikeraartoqarnissaanut tunngasut oqaatigineqartut naalakkersuisunngortussat isummernerinngimmassuk.