Inatsisartut ataasinngorpat inissitsitissasut
Inatsisartunut marsi aqqarnanni qinersinermi qinikkat inissitsiterlutik ataatsimiittussanngorput.
Inatsisartunut sivisunerpaamik ilaasortaasup, Hans Enoksenip (N), ilaasortaqatissani 30-it, ataasinngorpat apriilip arfineq aappaanni Inatsisartut ataatsimiittarfianut aggersarpai.
- Aggersaanerit nassiunneqarput. Taavalu 7. apriili 2025 Inatsisartut ataatsimiinnerat ulloq taanna ingerlanneqassasoq, tassanilu Inatsisartut siulittaasoqarfiat taavalu aamma Naalakkersuisunik ikkussinissat suliarineqassapput, Hans Enoksen KNR-mut oqarpoq.
Tassalu ataasinngorpat tulliani Inatsisartunut Naalakkersuisunullu ilaasortanngortut pisortatigoortumik aatsaat ivertinneqassapput.
Misissuisoqaqqaartoq
Tamanna siusinnerusukkut pisinnaanngitsoq, ukiuni 30-ini Inatsisartunut ilaasortaq oqarpoq. Inatsisartunummi ilaasortanngortussat pinerlussimannginnersut tamakkuninnga sulialinnit aamma misissorneqaqqaartussaapput.
- Taamatut sulisoqarpat uagut nukigisaarsinnaannginnatsigit, inatsiseqarnermut tunngasunik suliallit, Hans Enoksen oqarpoq.
Taakkuali suliaat Inatsisartoqarfimmut ullumi nassiunneqassasut Hans Enoksenip naatsorsuutigaa.
Angalaneq
Utaqqisalli taakkuinnaanngillat. Inatsisartunut ilaasortanngorumaartussat aggerfimminniit aamma Nuummukartussaapput. Taakkualu angalanerminni kinguaattoorpallaassanngitsut neriuutaavoq.
- Neriuppunga aamma angallannikkut pissutsit kipusoortitsissanngitsut. Inuiaqatigiinni politikkikkut sullissineq piaartumik pingaartumik Naalakkersuisut eqqarsaatigalugit aallartittariaqalermat, Hans Enoksen oqarpoq.
