Politiit umimmaat toqungasut pillugit suliami unnerluutiginnittut
Kalaallit Nunaanni Politiit Upernaviup kujataani Millorfimmi Amitsumilu umimmaat qimaannakkat pillugit inunnit sapaatip akunnera naanerani saaffigineqangaatsiarput.
Umimmaat aallaaneqarsimasut asiutinneqarput.
”Namminersorlutik Oqartussat nalunaarutaat nr. 8 umimmaat illersugaanerat piniagaanerallu pillugit 27. juni 2013-imeersoq”
- Paragraf 12: Umimmaap pisarineqartup neqaa tamaat pisaqarfimmiit nassarneqassaaq. Pisap sinneri sapinngisamik pisaqarfiup qimalernerani nassarneqassapput imaluunniit tupeqarfiit, illuaqqat akiliuteqarluniluunniit aallaaniarnerup ingerlanneqarneranut akornusiinatik inissineqassallutik.
- Paragraf 26: Nalunaarummi matumani aalajangersakkanik unioqqutitsinermi akiliisitsineq pineqaatissiissutaasinnaavoq kiisalu sunngiffimmi aallaaniarsinnaanermut allagartaqarsinnaaneq ima-luunniit inuussutissarsiutigalugu piniarnermut allagartaqarsinnaaneq arsaarinnissutaasinnaapput.
Saaffiginnittunit ataaseq - umimmannik unioqqutsitsisumik piniartoqarneranik unnerluutiginninnermik kinguneqarpoq - sumiiffiit pingajussaat Arfertuarsunniippoq, taannalu aamma Siggummiilluni.
Politiit tusagassiutinut nalunaarummi allapput.
Pineqartoq "Namminersorlutik Oqartussat nalunaarutaat nr. 8 umimmaat illersugaanerat piniagaanerallu pillugit 27. juni 2013-imeersumik" unioqqutitsisutut ippassaq unnerluutigineqarpoq.
Uumasut toqungasut pingasunngornermi nassaarineqarput. Suliamilu paasissutissakinnera pissutigalugu innuttaasunit ilisimannittussarsiornissaq pisariaqartoq politiit tallimanngormat nalilerpaat.
AAMMA ATUARUK Piniartut peqatigiiffiat toqoraaneq pillugu: Umimmattassiissutit sipporneqartarnerat nalinginnaavoq
Taamaammat Facebooki aqqutigalugu tallimanngormat ilisimannittussarsiortoqarpoq.
Ilisimannittussarsiornerallu arlalinnit sapaatip-akunnerata naanerani saaffiginnittoqarneranik kinguneqarpoq.
Paasissutissat nutaat takkuttut toqqammavigalugit sumiiffiit pingajussaanni umimmannik toqungasunik aamma nassaartoqarpoq.
Tassani umimmaat "arfinilinnit amerlanerusut" nassaarineqartut, politiit paasissutissiipput.
AAMMA ATUARUK Umimmaat qimaannakkat: Toqoraaneq piniarnermut allagartamik naleqarsinnaavoq
Taamaammat umimmannik unioqqutitsisumik piniarnermut atatillugu misissuiffigineqartut maanna marluulerput: Suliami ataatsimi Upernaviup kujataani Millorfimmi Amitsumilu umimmaat 30-t toqungasut pineqarput. Suliami allami Arfertuarsummi uumasut toqungasut ”arfinilinnit amerlanerusut” pineqarlutik.
Upernavimmi Politiit suliamik misissuinerminni Ilulissani politiinit ikiorneqarput. Taakku Millorfimmi Amitsumilu umimmaat 30-t toqungasut pillugit sapaatip akunnerata naanerani saaffiginnissutinik suliaqarnerminni ilaatigut killisiuissapput.
Killisiuinerit ulluni aggersuni naammassineqarnissaat naatsorsuutigineqarpoq.
- Innuttaasut saaffiginninnerannut qutsavigerusuppagut, taakku ataatsimik pasisaqartoqarneranik kinguneqareerput. Suliamilu peqqarniitsoqarnera annertussusaalu eqqarsaatigalugit tamatuma misissuiffigilluaqqissaarneqarnissaa pingaaruteqarpoq, taamalu pisoqaqqinnginnissaa neriutigaarput, Ilulissani politikommissær, Palu Eriksen oqarpoq.
Uumasut toqorarneqarsimasut qimagarneqarsimasullu Piniarnermut Aalisarnermut Naalakkersuisoqarfiup ippassaq aamma suliarilerpaa. Inatsimmimmi unioqqutitsineq ilungersunartuuvoq, tamannalu akiliisitsinermik piniarnermullu allgartagartamik arsaarinninnermik kinguneqarsinnaavoq, immikkoortortaqarfiup pisortaa, Amalie Jessen oqarpoq.
