Politiit ullormut nalunaarutaat: Arnaq inuusuttoq biilinik Sisimiuni aportippoq – apuisoq qimaavoq

Arnamik 18-inik ukiulimmik Sisimiuni biilinik aportittoqarneranik takunnittunit politiinut unnuaq nalunaarutigineqarpoq. Arnap biilinik aportittup niua napisimasorineqarpoq, apuisorlu apuinermi kingorna qimaasimalluni.

- Biilit apuisut qanoq ittuunersut takunnittunit politiinut nassuiarneqarpoq, politiillu biilit apuisut sivisunngitsumik malersoreerlugit unitsippaat. Biilinik apuisunik ingerlatsisoq angut 24-t missaannik ukiuliusoq paasinarsivoq, Kalaallit Nunaanni Politiit pigaartuisa pisortaat Carl Sværd oqarpoq.

Angut biilinik apuisunik ingerlatsisoq imigassartorsimatilluni biilersimasutut pasineqartoq taassumalu biilinik ingerlatsisinnaanermut allagartani annaasinnaagaa, Carl Sværd oqarpoq.

- Tamatuma saniatigut politiinit qimarratiginninnini aamma sukannersumik pineqaatissiissutigisinnaavaa, aamma inatsisinik allanik arlalinnik unioqqutitsisimanissaa qularutissaanngilaq, politiit pigaartuisa pisortaat oqarpoq.

Angullu taanna imigassartorsimatilluni biilersimanersoq paasiniarlugu aaversippoq, aaversinneranillu inernerusut pillugit paasitinneqarnissartik politiit utaqqimaarpaat. Tassa politiit suliani taamaattuni ingerlatseriaaseq malillugu misissuipput.

Nakuusertoqarneranik nalunaarutiginninneq – angut Islandiliaanneqartoq

Aasianni imerniartarfiit ilaata silataani ullut qulit matuma siorna nakuusertoqarsimaneranik politiinut ippassaq ataasinngornermi nalunaarutiginnittoqarpoq.

Ilinniarnertuunngorniaq 17-inik ukiulik nakuuserfigineqareernermini peqqiilliulermat napparsimmaviliaanneqarsimasoq tamatumalu kingorna Nuuliaanneqarmat aanaartoorsimasoq kingornatigut paasineqarsimasoq, politiit pigaartuisa pisortaat oqarpoq.

- Taamaammat timmisartumik Islandiliaanneqarpoq, maannalu suliaritereernermini ajunngilaq sulili perululluni, politiit taanna oqarpoq.

- Nakuuserfigineqartoq qanoq pineqarsimanerminik perulunnini pissutigalugu oqaluttuariaannaasimanngimmat, pisoq aatsaat ullut qulit qaangiuttut nalunaarutigineqarpoq. Napparsimmaviliaanneqarnermini aamma oqalussinnaasimananilu eqqumiitsumik sakkortuumillu qisuariartarsimavoq, Carl Sværd oqarpoq.

Nakuuserfigineqarsimasoq kollegiaqatiminit napparsimmaviliaanneqarsimavoq, napparsimmaviliaammagulu napparsimmavimmi sulisut nakuuserfigineqarsimasoq ikiaroornartutorsimanasoreqqaarsimagaluarpaat.

- Sakkortuumik nakuuserfigineqarsimaneranik ersiuteqangaarsimanngilaq, itertitassaajunnaarlunili siniinnalersimammat aatsaat aarleritsaatigineqalersimalluni.

Taassumunnga nakuusersimasutut pasineqartoq angutaavoq 20-t missaannik ukiuliuk, nakuuserfigineqartulli aanaartoorsimanera nakuuserfigineqarneranik ilumut aallaaveqarnersoq uppernarsaruminaammat nakuusersimasutut pasineqartoq politiinit tigusaasareernermini unnerluutigineqareernerminilu iperagaareersoq, politiit pigaartuisa pisortaat oqarpoq.