Sapaatit akunnerini marlunni pingajussaat: Politiit raajarniummi hashimik nassaaqqittut

Savalimmiormiut politiivisa hashi 1,8 kiilu Polar Seafoodip raajarniutaani Polar Nataarnami toqqorneqarsimasoq sisamanngornermi arsaarinnissutigaat.

Tusagassiorfik Sermitsiaq.AG taama allaaserisaqarpoq.

Savalimmiormiut Politiivisa suliaq KNR-imut uppernarsarpaat.

Kilisaammi inuttat umiarsuup tunisassiorfiani eqqiaanerminni hashi nassaarisimavaat.

Pingajussaanik iluatsitsinngitsoqartoq

Politiit Polar Nataarnami hashi katillugu 10,8 kiiluusoq sapaatit akunneri marluinnaat ingerlaneranni nassaaraat.

Siullermik Akisuutinut Aqutsisoqarfiup qimmiisa ikiaroornartunik naamasartut kalaallit raajarniutaanni Frederikshavnip umiarsualiviani tulangasumi hashi 4 kiilu juulip ulluisa 14-ianni nassaaraat.

Tamatuma kingorna kilisaat – pilersaarut – malillugu nunatsinnut ingerlaalerpoq.

Polar Nataarnarli ingerlaarnermi ukioq manna aappassaaneerluni aporpoq. Tamatumuuna iluliamut aporluni, tamannalu kalaallit raajarniutaata siuata innarlilaarneranik kinguneqarpoq.

Kilisaat tamanna pissutigalugu Savalimmiunut amutsivimmi iluarsaassiffiusinnaasumut ingerlaalerpoq.

Juulip 16-ianni – ullut marluk qaangiutiinnartut – Savalimmiormiut Politiivi hashimik 5 kiilumik nassaarput.

- Misissuisoqalaarnerata kingunitsianngua nassaarineqartup kiap pigisinnaaneraa paasineqarsinnaasimavoq. Pineqartoq sapaammi unnukkut tigusarineqarpoq, taassumalu tamanna nassuerutigaa, unnerluussisussaatitaasuuneq, Sermitsiaq.AG-mut oqarpoq.